店面雖然唔大，但餐牌就有好多唔同款嘅野食，雲吞、麵、小食、腸粉、飲品咩都有。由於佢主打正宗四川味道，好多款野食都有得揀麻辣風味，啱晒重口味嘅我～
1
韭菜豬肉雲吞拼是日特製雲吞（粟米雲吞），雲吞嗌十隻就可以雙拼啦。雲吞皮一睇就知係自家製，皮薄得黎煙韌，餡都足料。
秘製麻辣撈麵：原本諗住嗌個細細碗麵試下佢個麻辣醬，點知呢碗麵超大碗，先$24！麵嘅份量唔止夠多，仲有酸菜，撈暈佢麻辣帶小小酸咁，惹味！
跟餐加$15可以揀各式飲品，我地揀左杯金橘檸檬蜜，味道不過不失，同辣味嘅野食幾夾。
川味口水雞絲：係熱辣辣嘅夏天最啱食涼拌麻辣嘅野。呢度嘅涼拌川味口水雞絲用左好多青瓜絲、花生碎同麻辣醬撈埋，每一啖都有種清新爽口又麻辣嘅味道，啖啖肉得黎又唔滯，好好味呀！
香煎脆脆韮菜餅：望落似蔥油餅，但咬落去係超級無敵脆！係好薄皮炸到蘇脆果種！熱辣辣上碟，我朋友一食就停唔到口，因為佢完全唔會漏！個皮真係會食上癮，必試！
老闆娘好好人，見有啲檯冇嗌到野飲，仲主動問客人要唔要杯水，可能考慮到大家食緊辣野，超級貼心! 即刻諗起坊間有啲連鎖店特登唔俾水焗你買野飲仲要加一服務費...小店食嘅除左係美食，仲有令人滾動嘅人情味～
