煲師傅砂鍋小菜

Open Now

Now Closed

呢間雞煲放題喺旺角女人街附近，見佢寫$228任飲任食雞煲，仲可以打埋邊爐，價錢幾吸引，就去試吓。入到去餐廳座位舒適，枱與枱之間有足夠距離，唔會坐得好侷促。一開始佢有三款雞煲選擇，我哋選咗小辣嘅麻辣雞煲，雞煲炒得好香，一份有半隻雞，雞件好多肉，配料有洋蔥、花椒同芫荽，香香麻麻十分惹味，我哋仲忍唔住添咗一次。之後見到隔籬枱添第二次嘅時候換咗三重芝士口味，睇落都幾吸引，下次可以試試。食完雞煲店員加咗啲雞湯後，我哋就開始打邊爐。平時火鍋食物嘅配料，呢度基本上都有，我哋點咗肥牛、娃娃菜、牛柏葉、黑椒牛丸、芝士丸、海蝦、水魷魚和豬肉片等等，全部都係好正常平時食開嘅火鍋配料。值得encore嘅食物有肥牛、黑椒牛丸和牛柏葉，我哋都叫咗幾次👍最後，二百幾蚊任飲任食嘅雞煲火鍋竟然仲有Häagen-Dazs雪糕作結尾，真係超值。其實佢仲有好多小菜都好吸引，下次會去再試。