KOL Bakery (Closed)

是日去咗葵興做嘢，我話想買麵包做早餐，Office同事就帶咗我嚟呢間KOL Bakery。叫得KOL，賣相當然要夠打卡able。紫色嘅係芋蓉麻糬QQ。入面除咗有麻糬，仲有好香好滑嘅芋蓉。啡色嘅就係朱古力麻糬QQ。入面有滿滿嘅朱古力醬，但係又唔會太甜，大人小朋友都咁啱食。綠色嘅係宇治抹茶麻糬QQ。入面除咗有抹茶醬，仲配有紅豆，鍾意抹茶嘅就一定要試。黑白芝麻做外層嘅就係糖不甩麻糬QQ。入面真係有花生同椰絲，好有糖不甩風味。最後橙紅色呢個就係OPPA泡菜餐肉麻糬QQ。入面有泡菜、午餐肉，混入埋麻糬，結合咗鹹、甜、辣嘅味道，夠晒gimmick。