地點：北角堡壘街
菜式：上海菜
餐牌：單點美食包括上海點心如鍋貼、生煎包、小籠包及葱油餅，酸辣湯，麵點，風味小食。都有套餐，輕食套餐，精選推介，飲品等。
1
豬扒擔擔麵 $53
擔擔麵大大碗，黃色麵條唔粗唔幼，口感唔錯，蛋香十足，配個擔擔醬好味道，好香花生味，味道甜甜地。加有少少肉醬，伴有菜心一條，灑上蔥花。真心好味，口感味道一流。豬扒連骨，一開幾片方便食用，味道唔錯。
點心套餐包10隻鍋貼，酸辣湯同飲品，$62。
呢個餐令你可以食生煎鍋貼食個飽。
生煎鍋貼果然係米芝連推介小食，煎得底脆而上面皮薄又滑，入面肉餡唔錯。枱面上有黑醋自己加。
酸辣湯係飯碗size，好足料，味道酸酸辣辣，但唔會過辣，料有黑木耳絲，豆腐絲同鴨血絲，口感好爽口又滑溜。
菜肉餛飩 $27
菜肉餛飩一客六隻雲吞，皮薄餡靚，入口滑溜，都幾大隻，加上蔥花，個湯底好香餛飩味，真係非常好食。
爆湯小籠包 $32
小籠包一籠四粒，皮薄而湯汁夠多，肉都好鮮，出色！
蒜香牛油雞翼 加$28
蒜香牛油雞翼一客三隻，墊有牛油紙吸油。熱辣辣，整得皮脆肉嫩，味道剛好，好香蒜味，而唔會太濃，好香口。
凍檸七，凍檸樂 $12
係罐裝汽水配檸檬片加大大杯冰。另配獨立包裝飲管一。可以揀Coke Zero。夠凍。
總括而言，呢度除左生煎鍋貼，其他食品都唔錯，包括小籠包，餛飩同擔擔麵，真心好食。店舖簡單，座位大概有20個左右。
