今日放工諗住約姊妹去沙田掃貨，去到先知原來大特價未開始，只有部份貨品有優惠，空手而回，好失望，唯有去食餐好開心返。喺商場行咗一個圈，最後決定去試一試「塚田農場」。
1
黎得呢度，當然要食招牌菜「美人鍋」，餐廳依家做緊8折優惠，＄592 就食到美人combo套餐，除咗美人鍋，仲包括有雞尾酒、生春卷、壽司同甜品，非常豐富，望到心情都已經好返！
生春卷好有越南風味，係用米紙包住d蔬菜同海鮮，我地要左三文魚牛油果美人卷同鰻魚忌廉芝士美人卷。三文魚牛油果美人卷餡料豐富，除左d青瓜絲，仲有軟腍嘅牛油果，爽腍口感同時擁有，有趣！至於鰻魚忌廉芝士美人卷就味道比較濃郁，芝士配米香，又係另一番風味。
1
美人鍋係呢度名菜，聽講店舖標榜食材健康同新鮮為主，雞隻同湯底都由日本直送。一黎到當然飲個湯先，果然名不虛傳，非常creamy，雞味濃郁，膠質感重，完全感受到骨膠原嗰種厚實口感，好滿足。配上各式各樣蔬菜同免治雞肉，真係好健康！蔬菜吸收個湯嘅精華，變得非常入味，雖然味濃，但食完唔會口乾，證明真材實料冇味精！
壽司細細粒，非常精緻。帆立貝玉子壽司卷味道清新，玉子甜味帶出帆立貝鮮味，至於海老天婦羅脆脆卷都做得唔錯，蝦炸得夠脆，蝦肉爽口。
兩杯彷雞味酒都以果味為主軸，菜乃花以柚味主導，楓就係苺味，兩杯個味都係酸酸甜甜，岩晒飯後清一清個油感。
甜品係杏桃杏仁撻，除左香脆嘅杏桃撻之外，上面仲配埋雲妮拿雪糕，酸酸甜甜，為晚餐畫上完美句號。
Overall，食物質素都好新鮮，美人鍋鮮味十足又豐富，fusion 米紙卷同壽司口味亦佳，服務都好好，會再黎試其他口味美人鍋！
