魚滑粥粉麵茶餐廳 (Closed)

Item: Yue Wat Restaurant
Rating: 3
Author: 奧志雷

Yue Wat Restaurant

3.5

56 Reviews

Taste

Decor

Service

Hygiene

Value

294

Tai Po

Below $50

Guangdong

奧志雷

Level4

2.1K

Read full review

酒前要黎食，酒後都要食。打個底先隊啤，飲飽後醉昏昏再黎宵夜，人生就是這樣啊 ﹗始終腸粉唔係魚滑強項，最好食生滾粥、柱侯牛腩，煲仔飯、炸南乳雞翼、炸雲吞。隊左兩支紅酒醉醉地，係抗奮情況下大宴親朋，仲要自己送埋外賣添 ﹗無緊要，當順便探望玲姐、文哥，好耐無見。

湯生菜，甜美香濃魚湯浸完生菜散發清甜菜味，更加美味可口，梗係飲多兩啖啦。翠綠生菜清淺的味道，爽嫩多汁，帶著甜濃濕濕地食格外好味道。蠔油菜芯，難得高質超水準表現，一向唔食莖的我都將菜芯全部消滅。熱騰騰微微燙嘴最美味，菜莖超級爽甜可口多汁，莖葉鮮嫩翠綠沒半點渣，沾上蠔油好好味﹗

叉燒腸粉，所有腸粉皮都厚厚的鞋鞋的，叉燒粒雖然略肥，不過鬆軟香甜，再多一點就更好。炸南乳雞中翼，人氣作品，竟然一試上癮 ﹗即叫即炸熱騰騰，香噴噴撲鼻而來。金黃香脆外皮包住嫩滑多汁白雪雪雞肉，外脆內嫩散發香濃南乳味道，乳香非常，水準超然﹗

炸雲吞，金黃鬆脆，蝦肉鮮爽，重口味有少少略咸，不過配上大量甜酸汁可以中和一下，即時變得好味道 ﹗比湯雲吞湯更加好食添呢。如果有咕嚕汁就更開心啦，甜酸醬始終差少少。

蜆蚧鯪魚球，炸起發脹，冷卻後縮水巢皮，還保有少少餘溫。濃濃的咸香泛起少少魚味，搭上蜆蚧汁及咸蜆肉一齊食，咸鮮味出眾又獨特，神秘得使人有想食多幾啖既衝動呢﹗還過得去，不過不失，合格。

豬膶腸粉，即拉腸粉理應新鮮熱辣好好味，最敝運到返屋企要成廿分鐘，腸粉已經索晒豉油變到腍劈劈糊糊黏黏咯，何解豉油不是另上的嗎？何解中間會被劏左兩刀既？印象中好似腸粉唔會切啊。

少少的豬膶絲彷似大海撈針，過熟硬硬不爽彈，味濁帶澀。厚厚的發脹粉皮，鞋鞋乾乾，毫不滑溜，好飽肚喎。突然記起某晚成班老友係 Baby 食全腸宴，笑死左﹗

炸雞髀，專登要求不要炸太乾，比平時好少少 ﹗外層乾爽炸豉油髀，皮乾嚥韌不油膩，雞肉還剩微弱汁液，結實合格。過過口癮的質素，還個心願罷了。就係依隻炸雞髀搞到我喉嚨生飛滋，大大啖鯨吞幾啖後，喉嚨損左好鬼痛，最初以為喉嚨發炎，原來係生左好多粒飛滋，連吞口水都勁痛呢﹗我地其實想食三多超人氣好味炸雞髀，衰仔維記再次無接電話，應該忙到甩轆，最後是但食魚滑﹗

豉油雞髀，豉油與滷水難辨，現在我終於搞清楚喇。瘦猛猛的雞髀，毫不肥美香甜。黏黏的雞皮，乾乾的雞肉，浸到過晒龍再翻熱就乾上加乾，醃味單調淡茂茂。難得石哥請我食雞髀，梗係食啦﹗多謝多謝。

淨牛筋腩走蔥，生菜黏著濃郁腩汁齊齊食，爽甜索索聲，鮮嫩充滿水份，跟腩汁打成一片特別美味 ﹗魚滑出品柱侯牛腩多年保持超高水準，經長時間炆煮，讓香料柱侯汁完全滲透每條肉絲，變得亮麗淨啡色。

整舊原封不動掉入口慢慢細味，鬆化軟棉沒半點乾鞋半點渣，味道香濃，醃味清香不濁不膩。越食越想食，越食越開胃。如果沾上辣椒醬送飯必定食唔停口，不得了喇。

白灼腰膶，成座山的烚蔥絲，夠熟無腥味無嗅味，併上豉油夾腰膶我免強都食得到。脆脆嚥韌的腰，爽彈嫩滑肥美的膶，豬味甜而鮮味夠，簡單調味已經好好食。

白灼豬雜，粉腸脹卜卜肥嘟嘟，豬甜味突出，不苦不澀，高質彈滑，還有絨毛滑嘟嘟，多汁水潤好味到痺 ﹗豬膶厚薄適中，爽滑不鞋不硬，鮮甜不苦不澀，中間留有一絲粉紅色特別鮮甜。勁鬆肉片滑嘟嘟半腍半爽，滾上清香豉油又幾好食喎。豬肚前爽後彈，甜而不澀。豬心爽脆嚥韌，淺淺豬甜味道，不錯不錯。

薑蔥爽滑魚皮，貌似生鯇魚皮，其實已經烚熟，再用冰水浸住架 ﹗熟魚皮浸冰水，超爽超滑，爽脆趙到卜卜聲響，抑揚頓挫十分悅耳。一定要捲著薑蔥沾上豉油同吃，清香多汁散發麻油味更是滋味。大大啖蔥絲、薑絲、麻油加豉油，香口到不得了﹗

一切從爽皮開始，我由細到大都食唔到生蔥架，一放入口已經反胃。不過自從用麻油、豉油、辣椒、蔥絲、薑絲夾住爽皮一齊食後，依味撈野完全無反胃感覺，而且仲覺得好好味添呢，依道菜零舍唔同﹗

淨柱侯牛腩河走蔥分湯，返屋企山長水遠，唔分湯實變漿糊啦 ﹗分湯雖然唔環保又要計多個碗錢，但美食當前，為左河粉唔會浸到發脹過腍，少少犧牲在所難免，其實可以食完先返屋企既。

分湯仲送多條生菜，平時一向都無菜，多謝師傅。係時候一家團聚喇，讓滾湯跟牛腩河合體，禮成 ﹗濃郁柱侯汁滲滿牛腩每吋肌膚，每啖水潤爆汁，炆得極度入味甜美，質地軟棉鬆化，不乾不鞋不咸不濁，好味道讚不絕口。

辣椒油用外購獨立錫紙包裝？點解唔用返自家製辣椒油呢？淨油無渣，那會香、那會辣、那會好味道，失望。綿綿滑滑河粉索上辣油辣湯大啖大啖地吸啜，那種興奮刺激不能形容，極度暢快滿足，美味無限。

皮蛋瘦肉及第粥走蔥，豬肉丸，不爽不彈而腍劈劈，強差人意喎，不鮮不甜還有異味。皮蛋瘦肉，皮蛋質素就普通平凡，無黃油而味味，蛋白彈彈正常，瘦肉吸收甜美粥水鬆軟好味道。粥底美味世界級綿滑，厚厚黏黏，味道濃郁可口，鮮甜非凡，食勻省港澳無人能及，拍案叫絕，回味無窮﹗

皮蛋瘦肉田雞蠔豉粥全走加薑絲，蠔豉有料到，十足金蠔的味道，濃濃風味甘香，先結實後軟塾，蠔肚多汁可口，咸香餘韻使人念念不忘。田雞，有腳有髀也有身，平均供應有肉食。清爽肉味，結實肌肉滑溜溜，噒骨損得乾乾淨淨。

雜錦粥走蔥多薑絲，交比玲姐話事，我懶得諗。真係超級雜，什麼都有少少，多謝文哥。食材比粥還要多，其實我想食粥架﹗雞柳，滑嘟嘟醃味濃濃，搭上甜美粥水，啖啖滿意。

泥鯭，結實少骨啖啖肉，魚味濃濃梗係好食啦。魚腩，只給大骨腩位，不會頭頭尾尾則則膞。鮮甜肥美啖啖肉，滑中帶彈啜過不停。熱辣辣燙住嘴都照樣大啖大啖灌入口，實在太好味等唔切啊﹗

淨牛腩撈伊麵走蔥，柱侯腩仍舊炆得入味軟腍。撈伊比湯伊更彈牙更嚥韌，爽爽的吸收甜美香醇腩汁啜入嘴仔細味，幸福無比﹗淋上淨辣油，無好過有，微弱香辣，油味重重。炸魚皮，薄薄香脆無通風，淨食咸咸開胃，浸湯半脆半濕更滋味。

雲吞牛筋腩撈麵走蔥，雲吞的的骰骰但五臟俱全，蝦肉微爽、豬肉微甜、肥膏甘香不太多不油膩，雖然包得有點鬆散，吞皮滑溜內藏湯汁肉汁也是不錯的選擇。魚滑自家製辣椒油，我食淨渣少量油，辣椒磨得幼細，中辣程度蠻刺激味濃。

極爽幼麵，掛上濃湯辣油不停啜啜啜，趙到索索聲，刺激惹味拍爛手掌。捲牛腩同吃、捲雲吞同吃，將食味提升極致，滾動到痺﹗

雲吞撈麵走蔥加腩汁，狂撈學利辣椒渣，出汗流鼻水，十分刺激！雲吞比以前好食左喎。雲吞蝦子撈麵，洒上少少蝦子那夠撈呢？一啖消滅﹗無汁無蠔油撈，餘下的爽彈幼麵靠晒辣椒油喇。淨雲吞，清甜結實連清湯送入口加倍濕潤。

魚腩田雞滑雞粥走蔥，滑雞大肥雞件骨多肉少，胸肉有點乾鞋，厚厚滑滑雞皮，肥膏香口但太多咯。明火堅滾有誠意，並不是馬虎泡粥搵笨實，真心要讚。極度討厭某些粥檔自稱生滾粥，誰知執料沉底倒個滾粥係面就是但出貨，等食客自己撈勻浸熟去，粥底完全無生料鮮味，粥還粥、料還料，可惡無良心﹗

咸魚肉片黃鱔煲仔飯，好耐好耐無食過，以前經常打電話落定 order，飲酒前坐低慢慢嘆 ﹗梅香咸魚一開氣味四散，索一索舒筋絡、精神爽利。搗碎咸魚挑走骨頭，跟甜豉油飯撈得均勻透徹，大大啖塞入口，魚香飯香在嘴裡溶化，魚肉鬆軟混著飯焦美味無比，開胃醒神。

勁鬆肉片滑嘟嘟半腍半爽，輕易壓碎撈飯，咸香突出加甜豉油飯同樣美味。黃鱔柳新鮮出眾，鮮甜味強烈，沒半點腥嗅感覺，爽彈頂級，不會腍劈劈，超好食。三味跟飯齊齊掉入口，鐵甲無敵煲仔飯，味道夾到識飛喇﹗

咸魚肉片排骨煲仔飯，排骨醃得入味可口，半肥瘦啖啖肉質地軟塾又不帶肥膏，豬肉甜味濃郁搭上豉椒惹味，越食越想食，太過美味﹗肉片失手喎，完全無味既？質感過份腍劈劈。

咸魚黃鱔排骨煲仔飯，要煲耐少少，要乾身少少，還要多椒絲多飯燋，真係要求多多，麻鬼煩，哈哈 ﹗整包甜豉油倒晒落去，扲蓋再焗多陣。讓豉油跟食材白飯融合，讓豉油變暖散發香氣。

開呀，飯香特濃無得頂，肉香撞香料氣味，神仙都企唔穩呀。依煲飯堅係超水準演釋，滾熱辣噴晒煙，芳香無比香噴噴，淘醉到暈得一陣陣。細心地將所有食材、豉油及白飯撈得均勻，大大啖嚐一口，飯粒嚥韌乾爽、飯焦香脆，夾雜住清香豉油味道，不濁不膩，淡淡甜味而不帶苦澀，非常精采﹗

田雞碎牛粥走蔥，碎牛鬆軟帶滑，甜美香甜味已溶入粥底中，生色不少。榨醬撈麵走蔥，不孤寒搵笨，份量足料，多多肉絲多多醬，甜甜不辣的，先來原味混雜冬菇絲帶著爽麵，可口醒胃。淋上辣椒渣，先辣後甜，更惹味更食得有衝勁 ﹗

牛筋腩撈伊麵走蔥，幫襯多年一直對魚滑非常支持，對出品讚不絕口，係從未如此難食過！撈伊唔比腩汁，用咩撈麵啊？白烚發脹無味伊麵腍劈劈，仲散發強勁油益味！試撈辣椒油有無得救，硬食 3 啖都係要放棄！牛筋硬硬脆脆的，咬不斷要用手扯吧！淡而無味，是否未炆好呢？牛腩同樣硬硬的又乾爭爭，劣質評價。