見到呢間串燒店諗起好耐冇食啦所以就決定係呢度食啦！因為我地入去個陣時間仲早, 所以一入去就有位
而且店裡面有好多舒服嘅卡位同有2部大電視~相信好岩一大班朋友飲酒吹水食下下酒菜😝餐牌方面, 原來仲有酸辣粉麵, 不過今日專食串燒所以就冇食~再睇一睇~E! 價錢好平啊❤真係想每一樣都點晒, 而且仲分成海鮮, 肉類同蔬菜
首先黎左燒秋葵同鹽燒厚切牛脷扒~黎到見到牛脷扒嘩左一聲, 果然厚切啊, 但係咬落好林！而我地點左OK 辣, 所以辣辣地仲好惹味
而秋葵亦一樣, 小小辣~好香口
之後係一個我期待嘅之一, 芝士流心大啡菇~一切開個下又嘩左一聲
流心蛋黃十分吸引~仲有濃濃芝士味! Perfect match❤
之後係香草法式羊架, 一直都有好香香草味飄過黎~而肉都好嫩❤只係有一舊有好大舊筋比較難咬
燒鯖魚同泰式海鹽燒盲曹都有一碟非常惹味嘅泰式酸辣醬~❤十分開胃! 先分享下鯖魚, 雖然份量同出面差唔多, 不過 38蚊又燒得香口實在難得!
而燒盲曹黎到時我又忍唔住嘩左一聲😂😂因為冇諗過咁大條😂😂燒魚上嘅粗鹽帶出魚嘅鮮甜! 而且燒得剛好唔會太熟, 令到魚肉嫩之餘仲有 D 魚油! 大推~
最後係燒茄子, 見到多到見唔到茄子嘅蒜蓉汁係面我已經流晒口水😂😂😂鍾意茄子同蒜蓉嘅朋友唔好錯過💪
總結: 今日 2個人食左 total HKD400左右嘅串燒 (另叫左2罐野飲) 絕對係一間高 CP 值嘅串燒店, 位置方便, 有卡位, 食物份量夠而且味道好
值得一來啊~
