趁今日早收工就過驗證吓啦 😌
8 點 3 嚟到，鋪內 9 成滿，幫襯既都係附近街坊同返工人士 🧓🏻
驟眼睇，幾乎每一枱都係嗌蒸飯套餐
套餐包一份蒸魚/肉餅，一碗白飯同一碗例湯 🍚
有十多款選擇，平均 $44 就有交易，相信係晚市既主打
至於點心，選擇都幾多，蒸、炸、飯類、甜品樣樣齊
價錢比其他點心鋪平，大部份都係 $20 出頭 🥢
🔻👍🏻 明火例湯 （$10）
老黃瓜煲豬骨 🐷，賣相同味道都有家既感覺 🏠
份量裝滿一個中式粉麵碗，碗底搵得返豬骨，黃瓜皮同大量豆
味道純正且真材實料，絕對唔係一般茶記既例水，左溝右溝
🔻松子菜苗蝦餃 （$25)
一籠三粒，每隻餃都圓碌碌，可以清楚見到入面既餡好豐滿 🥟
餡料除蝦仁 🦐 同松子，仲有切成粗粒嘅荀同菜頭，食落爽脆
不過整體味道偏淡，餃皮有少少淋，勝在有口感搭救 🐒
🔻蠔皇鮮竹卷 （$20）
唔係一般汁多到瀉既鮮竹卷，食落唔乾，腐皮仍然煙韌
餡料以蔬菜為主 🥬，口感比較鬆散，蔬菜甜味重過肉味 🥩
雖然賣相唔算吸引，但味道同口感都合格，發揮正常
以上點心連 $6 茶錢，埋單 $61 💵
整體嚟講十分抵食，份量同質素絕對對得住個價錢 🧡
雖然唔太啱我口味，但如果嚟開附近都會再幫襯
🫖 最後一句，佢哋既茶靚過好多茶樓仔
