夜。鐵板燒

呢間鋪頭係山林道，傳統美食集中地，餐廳裝修幾有氣氛，又有師傅係正你面前燒俾你食，真係唔錯！晚市套餐$2388，頭盤湯主菜甜品齊晒，勁豐富仲要每樣都又靚又好食！刺身既拖羅已經夠晒驚豔，入口即化，魚油充足，另外既魚刺身都係好鮮味，仲有象拔蚌刺身都係好爽口，完全食到鮮甜味！前菜既蕃茄粟米都係日本既，味道特別鮮呀，亦好爽脆好清新！避風塘阿拉斯加鱈場蟹腳勁香口勁惹味，又同時保持到蟹腳既鮮味；燒龍蝦同瀨尿蝦亦都係好爽嫩好彈牙，口感味道一流！和牛肉眼就用關東壽喜燒既方法，肉質嫩滑，岩岩熟既牛肉點上滑溜既月見汁，簡直係味蕾既衝擊呀！就連一品料理，甜品同西瓜都係咁好食，一餐好完滿既omakase！