元洲牛肉麵 (青華閣) (Closed)

今日早左放工，咁就到附近小店支持一下。今次就揀左元洲牛肉麵。呢度開宗名義係食台式牛肉麵，由於想咩都試下，所以今次就揀左元洲三寶牛肉麵，包括有一塊牛肉、兩塊牛舌、兩塊牛筋。牛肉好軟稔，入口即溶的感覺，而牛筋就夠滑溜，咬落去有彈牙的感覺，味道就到餣得唔錯。不過最有驚喜係牛舌，牛舌的Size夠大，望落去好似塊牛扒咁，而牛舌佢地係有兩邊煎香，當你食的時候，你會感覺到柔軟的質感，夠晒嫩滑。湯底唔會過鹹，岩岩好，同埋Feel到無味精，飲完都唔會覺得口渴。最後就係麵底係用幼麵，唔會過淋，有Q彈的口感，麵質夠爽滑。而飲品就叫元洲奶茶，佢地奶茶係無加冰的奶茶，茶味夠香濃，係唔錯的選擇!