入到去係傳統中式菜館嘅設計，梳化位坐得幾舒服～餐前送酒小食有蕎頭同脆炸黃豆，黃豆炸得好香脆可口，少少辣好惹味
燒魚干 $48
口感香脆，惹味可口，除咗鹹香中帶點魚香味同醬油味，點埋沙律醬食非常夾，送酒一流～
刺身拼盤
通常火鍋店嘅刺身拼盤都係麻麻哋，估唔到呢度嘅刺身拼盤質素唔錯～ 有三文魚、北寄貝、帶子、油甘魚、象拔蚌～ 三文魚肥美鮮美；帶子厚身鮮味；象拔蚌刺身都唔係度度有得食，好爽口鮮味👍🏻
波士頓龍蝦
蒜蓉開邊蒸龍蝦最正，肉質爽口彈牙，好鮮味～
鮮海蝦
海蝦新鮮，蝦肉結實鮮味，肉質爽口彈牙～
鮑魚
鮑魚大大隻，洗得好乾淨，肉質爽口完全唔韌～
扇貝
蒸完都無縮水，入口啖啖肉又鮮甜，配上粉絲吸收咗扇貝嘅精華最夾～
貝殼三寶
包括蟶子、青口、蜆肉～ 蟶子新鮮有咬口；青口大隻飽滿；蜆肉鮮味，一粒沙都唔會有～
農家四寶蟲草花蒸雞配烏冬
雞件一啲都唔肥，配上養生蟲草花好入味～農家四寶包括南瓜、芋頭、粟米、節瓜，食咗咁多海鮮食返啲菜平衡下～ 烏冬好滑溜，吸收咗蟲草花同雞肉嘅精華好入味～
元貝粥底
粥底煲到好綿，加入元貝、排骨，再加上之前蒸完嘅海鮮精華，味道鮮甜，推薦一定要留肚食粥～
呢餐食得好滿足，海鮮份量同種類夠晒多，海鮮新鮮鮮味～ 店員都非常細心，每樣海鮮都把握最佳時間蒸同起鍋，令海鮮啱啱好熟又唔會過火，而且非常快手～ 食飯時間真係幾爆場，記得訂定枱就唔使排隊等～
