八歌仙 (家樂坊) (Closed)

今日屋企人生日，喺疫情期間，專登揀咗一間座位寬闊得來又有空間感嘅餐廳，位於家樂坊8樓嘅呢一間燒肉，一直素有聽聞。餐廳有唔同套餐可以選擇，當然肉類亦都會有唔同嘅等次。喺坐低消毒雙手，收埋口罩嘅期間已經送上左一盤燒肉拼盤上枱。來自日本嘅和牛質素好高，每款四片，可以先飲一啖茶後開始作戰！牛上脾脂肪比例較少，建議先食，牛三角嘅牛味好突出，同時較有咬口，牛背峰屬最有牛脂感，食落軟淋。另外仲額外點左啲澳洲和牛和豚肉，特別喜歡五花腩，肥瘦相間，有嚼勁之餘仲好有豚香。而M8澳洲和牛板腱油花較少，但食起上黎牛味亦重，無咁容易濟口！除左燒肉，呢度套餐嘅價錢，亦包括火鍋、小食、料理、壽司等等。叫到成枱都係但係一樣都無漏過單！天炸羅、芝麻雞翼炸得皮薄香口，茄子南瓜亦唔會炸到過淋太散。特別欣賞串燒雞翼已經拆好哂單骨，燒係上嚟非常方便又易熟！而炸小池魚同雞軟骨粒亦一樣食唔停口，就算涼左都可以放上烤盤度翻熱，好香好脆！最後都好想讚一讚呢度嘅蔬菜種類好多，就連蘆筍、冰茶、小棠菜都有得叫，放落壽喜燒湯底，清清甜甜又解油膩。