我地點左個套餐，有12串串燒之餘，仲有梅子雞、魷魚一夜光、安格斯牛小排、茶壺海鮮湯、燒飯團、溫泉蛋雞軟骨串。淨係睇到呢個陣容就知道值回票價。
先講12串燒分別有冬菇、黑豚肉、雞軟骨、雞頸肉、雞尾、韭菜、大葱、粟米、白鱔等等。
黑豚肉望落雖然有啲肥，但係食落就只有油香同豐富的肉味完全唔會覺得佢係肥膩。。雞尾亦係一個意外驚喜。相信大家聽到雞尾都知道係雞pat pat，佢不單止完全唔會有蘇味或者污糟嘅感覺，而且咬落去有油份媽重，係一個幾特別嘅口感。
雞頸肉喺出面比較少機會食到，起初以為佢係冇肉食，但其實整咗串燒後都係啖啖肉，而且雞油豐富肉質鮮嫩，比想像中好食好多。
白鱔燒得皮脆肉嫩，一啲都冇腥味，連
一向好少食魚嘅我哋都好欣賞，值得encore。
茶碗海鮮湯造型特別，啖啖都係鮮味，味道幽香，十分好飲。
溫泉蛋雞軟骨，蛋香幼滑，雞軟骨口感爽脆，兩者配合起嚟天衣無縫，令人回味無窮。
最後當然係食番一個小飯團做結尾，細細粒嘅燒飯糰每邊燒得香脆，中間仲有啲明太子，更加係香氣四溢，食完想再食。
今次雖然荷包大出血但係食到咁高質同多樣化嘅食物，我哋已經諗定下次要幾時再嚟食過。
