上星期有朋友生日 
要請食飯 係table map見到呢間餐廳幾靚 又有8折 所以就book左呢間 
餐廳係sogo附近 都唔算難搵 (其實一早做定功課
) 餐廳內擺設簡約 設計都幾特別 牆身上係森林設計 有一種處身於大自然的感覺 
環境都尚算舒服 燈光稍為微暗 檯上放左燭光 成場環境氣氛都幾浪漫 所以在場有8成都係情侶 
坐低無耐 有位侍應向我地介紹今晚既餐單 (侍應幾靚仔
) 我地簡左Royal Supreme menu 一共8道菜
入正題
煎西瓜拼煙燻蠔多士
靚仔侍應介紹菜式時特意詳細講解呢道頭盤既食法 心諗有咩食法咁巴閉
侍應建議先食西瓜 再食多士 梅花間竹咁食就會食出西瓜會變化出三種唔同既層次 
講多無謂 食最實際！試試先！ 西瓜就食得多 暖既西瓜真係第一次食 ！ 口感幾新奇 洋蔥令西瓜變得更爽更香口 未試過食西瓜食到有呢種感覺 黑醋令西瓜變得甜甜地 又爽又甜 果然有驚喜！多士外型都幾迷你 上面係煙燻蠔 同樣地係第一次多士配蠔食 感覺又幾滋味 
香煎鵝肝沙律
鵝肝煎得外脆內軟 入口即溶 好味！值得稱讚既係入口時冇油淋淋個種feel
而沙律既醋汁令其膩的感覺消失 沙律都好好味 冇得彈！ 
白松露醬帶子剌身
重心推介！
白松露味非常香濃 諗唔到用黎配帶子係會咁夾 超好味！一入口已經感覺到一大陣白松露香味在我口內徘徊 帶子鮮味十足 肉質嫩滑 天呀！ 我真係唔捨得食餘下既帶子！
黑松露野菌湯
靚仔侍應講話係招牌菜之一 介紹時講用超過二十種茹菌煮 係真唔係呀
一開蓋已經聞到陣香味 一入口感覺更係超讚 味道濃郁 淡淡茹肉有咬口 一兩秒之後味道更慢慢係舌頭兩邊滲出來 唔知係咪加左奶 個湯好滑 好似有股力量推動我快d再試 
味道神級 呢個湯非常出色 果然係招牌菜 
法式魚子蒸蛋
花心思之作 賣相吸睛！
蛋質可以再嫩滑一點 可能蒸耐左小小 味道都可以 加左魚子醬令其味道變得更突出 都okay 
不過嫌佢份量太少 意猶未盡！
雪葩
雪葩係柚子味 超讚！味道方面柚子味好濃 不過就冇雪糕咁滑 聽侍應講係清下個味蕾 令口腔個温度降低為食主菜作好準備喎 餐單設計上都幾細心
香粉燒雞
賣相不錯 係一隻雞脾
燒雞脾外皮香脆 咬落脆扑扑 雞既肉質頗實但又幾嫩滑 切開時見到雞油流緊出黎 時間控制得岩岩好 正！水準之作！ 配菜方面份量相對較少 如果多d蔬菜或薯蓉就更加完美 
心太軟
呢個心太軟外皮脆 最意想不到係入面有酒心 令成個心太軟變得特別左
味道方面就唔太甜 建議朱古力味可再加強一點點 因為我超愛食朱古力！
總括黎講 高水準既晚餐 由頭盤去到主菜都好出色
不過就略嫌主菜份量少了一點 建議可加多少少配菜 服務方面都算okay 侍應靚仔之餘都幾有禮貌 會再來！
