洪祖師 (Closed)

由於早前嚟食過覺得超正同一試難忘，所以我們今晚特意再去上水馬會道嘅「洪祖師擔仔麵」食晚飯！我們叫咗茄子炒肉燥配珍珠米飯嘅茄子好軟滑，肉燥嘅味道調教得恰到好處，濃郁得嚟唔會過鹹，用嚟撈飯食真係一流呀！台式三杯鷄係將啲嫩滑嘅鷄肉切成粒，醬汁嘅味道相當惹味濃郁，而且帶啲甜味！至於豬腳三重奏同紅燒牛肉湯麵就同上次嚟食一樣咁正，可以一直保持水準，我們亦同上次一樣都將整碗湯飲到一滴不漏！除咗招牌必食嘅紅燒牛肉湯麵之外，我們當然要叫埋清燉牛肉湯麵嚟食啦，初頭以為清燉嘅味道會好淡，但飲第一啖湯就令到我們覺得非常驚喜，因湯底嘅味道超級鮮甜，白蘿蔔亦都係極之清甜，最好嘅係無渣㗎，可以令到我們諗起星爺周星馳喺電影「食神」裡面提及過「蘿蔔有渣就係失敗！」但呢度嘅蘿蔔係無渣嘅，所以係超成功嘅！牛肉嘅肉質係非常鬆化腍身，而且相當厚身，令到口感好豐富，啱晒一向鍾意食厚切嘅我們，真係超正呀！亦都係我們另一個必食推介！