酒家鋪面唔算大，但都客席滿座，晚市有多款小菜同套餐選擇，呢到見最馳名就係佢啲招牌燒味，啱哂我口味！
因為時間尚早未算好肚餓，只係點咗燒鵝皇例同埋叉燒皇例同埋肉鬆炒四季豆。
燒鵝比咗髀位我哋，啖啖鵝肉！鵝皮燒到香脆，咬落去啲鵝油喺口入面爆發，雖然好邪惡，但真係好好味！
叉燒皇雖然係例，但份量十足，每件叉燒都大大塊。叉燒肥瘦適中，肉質非常軟稔，最怕食到啲叉燒又乾又鞋。新強記叉燒非常出色，下次都會encore！
呢碟又係餸飯一流，鑊氣夠炒到非常香口，食到陣陣肉鬆嘅油脂香同埋香蒜味。必讚係四季豆好貼心咁搣咗兩邊嘅絲，所以食落完全無渣！而且份都係十足！
呢間外表古色古香，望落有啲舊嘅酒家，但食物絕對有質素！
