南山冰室 (Closed)

新開張5折優惠，咁抵即刻同朋友黎試下，雖然係冰室，但食物選擇算多喎，仲有好多星馬印口味添。新開張，店內都幾濶落。星馬咖哩吉列厚切豬扒飯（$58）自己要左個咖哩飯，塊豬扒真係好厚，吉列又香又脆，豬扒軟腍肉感十足，啖啖肉無骨好正。馬來咖哩有咖哩香之餘，仲有蕃茄味，不辣但好好下飯，撈飯食勁正。不過餐牌上寫係配香蘭飯，就真係食唔出啦，好似係普通白米飯黎？肉骨茶（$38）見有半價又試下個肉骨茶先，上枱時都幾香。味道清淡不夠葯材味，而且大size都係用裝咖哩汁個種碗仔？咁跟餐加$20嘅細碗可以有幾細呢？真心好奇…招牌海鮮喇沙（$55）朋友叫喇沙湯麵，大大碗好足料，湯底濃郁有辣勁，香口又惹味。麵底係摻摻油麵加米粉，雙重口感，加上吸滿湯汁好味喎。熱奶茶（+$6）＆凍馬來咖啡（+$9）自己要左熱奶茶，茶香奶滑好好飲。朋友杯啡好香濃，天時暑熱飲杯凍啡涼透心。半價實在太抵，所以後日又同朋友去食多次。不過就算係正價，飯餐麵餐咁大份量又好味都係抵食嘅。