利寶閣 (Closed)

有時諗食飯去邊度食都好頭痕，因為實在太多選擇，而且人人口味唔同，作為飯局搞手一定好頭痕， 今次見呢間利寶閣都幾多好評，而且仲有好特別嘅中菜放題，無論想食乜都有，一於去試下。因為我哋早到嘅關係，人客都未算太多， 不過大概八點就差唔多滿座，好彩有早到。重點當然要試下呢個任食嘅片皮鴨啦，配埋蒸好嘅麵皮，同埋配菜一齊食，好好味。鴨肉唔會太肥，而且個皮仲好香脆。亦都可以從小菜紙上面揀唔同嘅小菜，海鮮以一人份量計算，可以食多好多款唔同嘅菜式。先嗌咗個五香牛展同埋腎片試試，賣相同味道都唔錯，作為前菜幾開胃。呢度嘅避風塘炸蝦都ok，炸得好香脆。避風塘炒蟹都好香口，不過蟹肉就比較淋。不過比較令人驚喜嘅就係呢個佛跳牆燉湯，入面真係好多材料，有鮑魚有雞肉有花膠等等，飲落好滋潤清甜。另外亦都推薦試下呢度嘅欖角美味骨，非常特別，外面甜甜地，而且脆卜卜，入面就好多肉汁。生炒骨都整得唔錯，好有鑊氣。每人大概都係三百零蚊，但係都試到幾多款唔同嘅菜式，質素都可以，同平時一般嘅放題差唔多價錢，如果想食放題，中式放題都係一個幾特別嘅選擇。