就諗起去食蛇。
記得在上海街，日日都經過一間食蛇的，
於是今日午餐，便決定前來。
坐低就見到桌上餐牌，主題是午餐，目標是食蛇，
當然二話不說向蛇王點了這個。
先由蛇王端出蛇羹一碗。
蛇羹食落足料，亦都好夠味。
十分唔錯~
正在享用蛇之際，蛇王突然發問，導致發生笑料一則...
蛇王：要咩腸呀？
本人：嚇，咩腸？
蛇王：臘腸糯米飯要咩腸呀。
本人：咪臘腸？
蛇王：要臘腸定鴛鴦腸呀？
蛇王一言，頓時醒悟，原來腸...係有得揀...
最後由蛇後端出鴛鴦腸糯米飯一碗。
話說咁大個仔，第一次見唔係生炒的糯米飯，
食落又幾好食，冇生炒咁難咬之餘，仲冇咁油~
雖然與食物無關，但係都不得不提的是，這店子充滿人情味。
蛇後放低碗糯米飯時，十分貼心地提醒：「唔洗加豉油，夠味架喇。」
而席間亦聽到蛇王蛇後不停與熟客閒話家常，又會與客人開玩笑。
更有街坊主婦行過寄放在街市剛買的餸菜，說接送小朋友後回來再拿。
只係食一個午飯的時間，已經感受到蛇王蛇後兩夫婦，
在此用心經營幾十年得出的人情味。
比起多幾間太刻薄的連鎖食店，
我更想要的，寧可是多幾間這種小店吧。
