中午行咗去黃埔嗰邊搵嘢食，我發現有間新開嘅小店叫「台北人」。雖然佢係一間外賣店🥡，不過仍然有花心思裝修，木系嘅門面打卡一流。
小店由一對年輕男女主理(個女仔好靚女🙈)，主打台式便當同小食🇹🇼。佢哋目前所賣嘅食物款式唔算多，希望遲啲會有埋拌麵食啦。
我同同事一人要咗一個便當🍱，再加一份蛋餅，價錢就屬中等水平啦。訂單數量唔少，但食物製作過程大約只係十分鐘，相當快手。
外賣盒造型似足台灣鐵路便當🚝，搞到人好想去旅行啊～。
排骨便當($65)，🐷炸排骨超大塊，外皮炸得好酥脆，完全係台灣夜市鹽酥雞嗰隻皮。即使係豬扒，但肉質都唔嚡，加上厚切，口感唔錯。
雞腿便當($65)，🍗炸雞腿同樣係加大碼，整體調味同排骨相若，不過肉質就當然再嫩滑啲。我平日唔食雞皮，但炸完融為一體，成塊食晒。
便當盒睇落唔係好大個，但其實飯量都唔少🍚，而且仲有好多配菜，包括滷水蛋、木耳、粟米同椰菜，好豐富呢。我唯一略嫌飯質稍為濕咗啲。
玉米肉鬆蛋餅($35)，🌯蛋餅可自由組合配料，淨蛋餅$22，我加咗粟米($5)同肉鬆($8)。蛋餅唔錯，熱辣辣整起，餅皮柔軟，滲透蛋香🥚，而所加嘅配料份量都足，再沾埋醬汁，口味正宗。
阿嬤冬瓜茶，隨便當奉送一包冬瓜茶🍵，味道超正，好好飲。佢有應有嘅甜度，但唔會過火，飲落好香，消暑解渴飲佢無得輸🤤。
題外話，從玻璃望入去可以睇到廚房同便當製作過程👀。
總括嚟講，呢度嘅便當能夠令人聯想起台灣嘅味道，特別係肉扒嘅炸皮，佢做得到台式嗰種酥脆👍。我希望小店遲啲可以賣多幾款嘢食啦，咁就可以幫襯多啲。
