香港目前有21間分店,灣仔恆山中心分店位於合和中心附近,開左接近一年,不過咁耐都冇人o係 OpenRice 寫食評
呢間分店位於地庫,可能租金較平先可以開咁大間分店,設有 60 個坐位,應該係全港最大間 Subway 分店:),主要客人係附近上班一族及灣仔出沒o既外籍人士
店內設有三部電腦俾客人上網:)
皇后大道東入夜後較少人流,我地當晚九點幾到達,只有幾個客人幫襯
Subway 慣常聘請外籍人士做員工,餐牌雖然有中文,不過外籍員工唔識中文,顧客要用英文點餐,客人若果唔識用英文溝通就會雞同鴨講:(
不過恆山中心分店係本地員工,大家係同鄉會有多一份親切感,可以用中文點餐
早前o係網站用每張$25 o既價錢買左兩張 coupon,每張 coupon 可以當$60 用,每次交易可以用多張,今次 coupon 有效期長達一年,我地o係 coupon 到期前兩星期先享用團購優惠
除左 Sub of the day 同埋逢星期二 3pm 後買一送一優惠外, coupon 適用於所有美食及飲品,包括特價套餐
有別於其他分店,店員先核對 coupon 資料,之後先可以點餐
我地要左一個芝士牛扒潛艇堡 $39.8, 加$18轉做12吋長潛艇堡,一個6吋肉丸潛艇堡 $39.8,我地呢兩個潛艇堡各自再加$12轉 meal,即係多一杯汽水及一包細 Lay's 薯片或者兩塊曲奇餅
6吋肉丸潛艇堡 $39.8
呢款肉丸潛艇堡用左意大利風味肉丸,Subway o既秘方大蒜番茄醬,自選新鮮蔬菜及調味品,再配上新鮮出爐o既麵包
我地兩個潛艇堡都選左意大利香料麵包(parmensan oregano)作為包身,店員先翻熱個包,再淋上蜜糖芥末醬
肉丸潛艇堡o既配料除左紅洋蔥及青辣椒外,其餘六款蔬菜都要
芝士牛扒潛艇堡 $39.8, 加$18轉做12吋巨型foot-long潛艇
呢個潛艇堡o既靈感黎自令費城名氣大增o既何奇三明治(Hoagie),令人垂涎三尺o既低脂、柔嫩o既牛排切片,配上嫩炒洋蔥及青椒,覆上一層熱融融o既芝士,再配上各種自選新鮮蔬菜及調味品,夾o係新鮮出爐o既麵包就成為芝士牛扒潛艇堡
要晒全部蔬菜做配料,真係份量十足
,好適合非常肚餓o既人食,又或者兩個人一齊享用
個包壓得唔夠實,一打開包裝紙就散開:(
我地兩個餐每人再加$12轉 meal,即係多一杯汽水及一包細 Lay's 薯片或者兩塊曲奇餅
平時超級市場一包細 Lay's 薯片賣四個幾,黎到 Subway 就梗係要兩塊曲奇餅啦!
由於當晚就快收舖,只得最後五塊曲奇,店員就俾其中四塊我地,冇得選擇款式:(
兩杯汽水係自己斟,汽水機有六款汽水可供選擇
我地以前去過幾間 Subway 分店,今次係首次o係 Subway 見到汽水機隔離有部冰塊機,呢部機o的冰比較細粒,會慢慢跳落黎,唔會好似便利店o的冰塊機一隊個杯埋去就跌左半杯冰落個杯:(
汽水機隔離有個自助櫃位,客人可以任拎餐具及預先包裝調味料,可能與麥當勞o既客人對象唔同,Subway 唔會好似麥當勞向客人配給餐具及調味料
我地叫左咁多野o既總數係$121.6,之前o係網站以$25買左兩張$60 coupon,埋單時額外補左$1.6,即係平均每人只需$25.8 就食到即叫即製,用左大量新鮮蔬菜,低脂,非油炸o既健康潛艇三文治:)
呢間分店臨收舖前都繼續做生意,店員唔會顧住清潔,值得一讚
時間好快就夠 10pm 關門時間,我地將食剩一半o既12吋長潛艇堡拎返屋企,至於飲剩半杯o既汽水就一路行一路飲
留意到呢間分店o既紙巾上印左四間分店資料,灣仔恆山中心,灣仔盧押道,愉景灣及昂坪市集應該係同一個老闆喔!
Subway o係香港目前有21間分店,佢地計劃未來7年o係香港及澳門開設140間分店,以後想食健康潛艇三文治就更加方便
