餐牌上嘅菜式選擇唔多，價錢屬正常。
餐廳環境簡約，坐得好舒服。我哋去嘅時候啱啱開門，所以冇人，跟住坐咗一陣先開始有人。
我哋叫咗廚師推介洋蔥湯，洋蔥湯好濃郁，好有層次，佢唔似平時洋蔥湯表面鋪滿芝士，就中間嗰度少少。旁邊有3塊麵包，烘烤過，熱辣辣好好食！麵包佢上面個啲醬係重點，唔知咩醬，有啲似乳酪，配上佢嗰塊熱辣辣嘅多士，超好食！
跟住有呢個Ricotta Cheese沙律，估唔到佢份量咁大！芝士又多，才$78，可以呀！！味道又好，增配兩塊多士，其實淨係食呢個沙律已經夠晒飽！低估咗佢。
最後呢個係茄汁吞拿魚手造意粉，係餐牌上無既。係服務員介紹比我哋食，好食喎，茄汁吞拿魚煮得好好，唔會有腥味，手造意粉望落去好厚咁，但食落去唔會有麵粉味，好食！
呢個價錢食到呢種質素嘅食物，我覺得抵食喎，特別係個沙律，大碟份量又足，$100都唔使，超抵食！服務員有笑容又有禮貌又親切，一定會再去食既餐廳！
