龍門一番 上海·紫砂燉湯 (Closed)

朋友家住荃灣，呢日約咗佢食飯，喺商場行住等佢嚟嗰陣，見到呢度幾得意，店名寫住紫砂燉湯，我又真係未試過，於是攞定位等朋友過嚟食飯。餐廳墊枱紙好得意，設計到好似好富翁咁，好吸睛!店員會問飲咩嘢茶，揀好咗之後，佢就會俾個茶包你加落個茶盅，呢樣嘢幾好，如果同朋友口味不同，就可以各有各揀，呢個安排唔錯! 倒完茶葉落個盅仔度，可以想飲嗰陣先加水，自己控制茶嘅濃淡，呢個設計1盅1杯，唔會倒到成枱都係，真係好方便。我哋叫咗花膠螺頭干貝燉雲吞雞湯，佢係用紫砂湯壺裝住啲材料原盅燉，原汁原味，材料有螺頭、花膠、老雞、金華火腿、干貝、瘦肉等，雲吞就分開上，燉湯顏色清澈，飲到啖啖鮮味，花膠充滿骨膠原，好有彈性，螺頭好爽口，紫砂壺有保溫作用，飲咗一陣都唔會凍晒。蟹粉炒飯炒得香口乾身，蟹粉個醬汁令個飯更香更滑，最怕食到啲蟹粉唔新鮮有腥味，呢個就完全無，唔錯! 餐廳都坐得舒服，同朋友唔覺唔覺又傾咗一個晚上。