星期日同呀爸呀媽去咗沙田拜山，佢哋話好多年無去過「龍華酒店」，唔知而家變成點，而我就直頭無嚟過。既然去開附近，就行多幾步睇吓👀。
龍華位置距離火車站大約15分鐘路程，唔算遠。沙田站向IKEA方向行去禾輋村，再沿住火車路行多陣就到🚶♀️，離遠會見到好大個招牌。
入口處有個古色古香風格嘅門牌，然後就係一條掛滿燈籠嘅斜路🏮。驟眼睇都有啲似日本嘅神舍㗎，打卡一流。
本身見沿路無乜人，心諗唔通真係過晒氣，無人幫襯，原來係我諗多咗🤣。呢度座位非常多，仲要全場爆滿，人氣超高！室內冷氣爭少少，不過四周圍貼滿歷史相片，保留咗懷舊氣息。
龍華脆皮燒乳鴿($98/頂鴿)，🦆乳鴿係餐廳嘅首席招牌菜，每一枱都落手食緊。乳鴿分頂鴿同中鴿兩個大小，頂鴿重8-10兩，真係比平日食嘅肥美同好肉。餐廳幫忙一開四，食得方便。
睇餐牌介紹講乳鴿先用滾水輕烚，然後用滷水汁浸熟，再喺鴿皮塗上麥芽糖拎去燒。乳鴿燒至金黃香脆，鴿肉好香兼多汁，就咁食都已經好食，當然沾喼汁同淮鹽就更佳🤤。
古法蜆芥牛仔肉煲($168)，用煲仔上果然保持到溫度，食到尾都仲熱辣辣🔥。牛肉有好多片，肉質都嫩🐮，另外仲有翠玉瓜同燈籠椒。蜆芥汁幾香，無想像中咁濃味，反而薑蔥味就幾突出。
如意竹笙上素($148)，呢碟素菜調味唔鹹唔淡，可清清味蕾。綠色蔬菜主要得西蘭花🥦，不過再配上大量雜菇、竹笙、木耳、雪耳、粟米筍同芽菜等，食起上嚟都幾豐富，而竹笙就最為索味🍄。
生蘑杏汁炖白肺湯($88/位)，🐷豬肺湯煲至奶白色，飲落清潤，無添加味精，亦唔油膩。湯渣有瘦肉、雞件同豬肺等，但定價稍高，多人嗌一大窩就好似抵啲。
原味手造豆腐花($68/桶)，豆腐花又係另一名物🥛，細桶仔足夠四個人食。豆花荳香唔算特別濃，不過勝在口感細滑。佢唔係用黃糖搭伴咁普通，而係採用自家調製嘅桂花糖漿🌼，甜蜜不膩。
食完飯再喺園區四周圍行下，而家嘅天氣坐户外都唔錯😊，感覺開揚自在。呢度其實除咗我哋坐嘅「貴賓廳」之外，仲有其餘幾個廳都開放。
即使唔嚟消費食飯，我諗遊人都可以入嚟行過圈。佢嘅花園經翻新過💐，雖然天黑睇唔清，但都隱約滲出歐洲風情，而且仲有鞦韆。另一邊廂就有兒童遊樂設施，以及賞鳥區，有孔雀睇🦚！
總括嚟講，龍華酒店係一個幾得意嘅地方，喺香港馳名八十多年🇭🇰。雖然餐廳近年評價好壞參半，但我又覺得食物味道不俗，價錢亦係合理水平！今晚嘅體驗就令我覺得好似去咗個小旅行✈️，俾少少想像力，都有啲似喺台灣九份吖。
1
