間酒家由巴士總站行入去大概5分鐘左右，穿過晒所有海鮮酒家，行到去一座紅牆建築物就係喇，比其他海鮮酒家遠，但就新正d同裝修企理d!
飯前先嚟個沙薑雞腳食住先。d雞腳幾好食﹑幾入味。我地今晚仲叫咗豉椒炒蟶子﹑椒鹽賴尿蝦﹑蒜蓉蒸扇貝﹑芝士龍蝦伊麵﹑蠔皇扣鮮鮑﹑海膽炒飯﹑蒜蓉炒菜心，同埋紅燒乳鴿。食飽飯，經理仲請我地食咗個甜品併盤同生果盤。
豉椒炒蟶子: 蟶子大大隻好肥美
蒜蓉蒸扇貝: 扇貝都幾大隻，仲有好多粉絲
芝士龍蝦伊麵: 龍蝦啖啖肉，唔似之前喺第二度食嗰d咁，腳多過肉。不過芝士味略嫌淡咗少少。
椒鹽賴尿蝦: 大大隻賴尿蝦，椒鹽味勁正
蠔皇扣鮮鮑: 以烹調乾鮑嘅煮法嚟泡製鮮鮑魚，食落口感真係有d似食緊乾鮑
紅燒乳鴿: 酒家提供八種唔同口味嘅乳鴿，我地就試咗紅燒嘅。不過呢個麻麻地，同埋D鴿比較的骰。
海膽炒飯: 炒得好香，仲有好多海膽，食到尾都仲見到好多海膽。
甜品併盤: 呢個好正，我地試咗桂花糕﹑椰汁糕﹑咖啡糕﹑菠蘿糕同埋士多啤利糕。細佬話粉紅色嘅士多啤利糕最好食。
d侍應嘅招呼好好，好有禮貌。同場仲有幾個唔同家庭喺度慶祝生日。下個月老豆生日，都會考慮嚟呢度慶祝。
