小女子一向好鐘意發掘d樓上店，貪佢夠靜又唔駛比人催你食。最近好想食法國菜，睇雜誌見到呢間法式私房菜做松露餐，所以就約左個好耐冇見既friend食dinner，悠悠閒閒咁傾下計，食個飯。我早3日book左枱。待應話番比我知其實早一日book都ok架喇
入到餐廳覺得成間餐廳好有格調，同埋唔會好逼。我地叫左同兩個set meal，自己本身鐘意食松露，所以真係好期待呢餐！
欖油黑菌醬田園沙律
首先係個田園沙律，個配搭好好特別，因為食沙律唔係落沙律醬就係黑醋，食到悶悶地，呢個沙律加左欖油黑菌醬，d醬食落有松露既香，配埋新鮮既沙律菜，勁fresh，而且兩樣野出奇地夾，即刻好開胃~
松露白菌湯
之後就上個松露白菌湯，平時去食西餐我都一定係叫白湯，呢個松露白菌湯啱晒我心意，個湯好濃郁，除左松露味之外，仲有打到好細粒既菌類，口感好豐富，唔駛落太多忌廉都覺得夠香，yummy~
白露筍配西班牙火腿黑松露荷蘭汁
之後就到白露筍配西班牙火腿黑松露荷蘭汁，第一次見到白色既露筍覺得好得意，露筍本身好清甜，同埋個松露荷蘭汁唔會太濃，唔會搶晒露筍本身既味，仲有加埋片咸香既火腿，食落幾夾，原來火腿唔配哈密瓜都幾好味架喎。
香煎三文魚配泰式酸汁
等左唔係好耐主菜都上lu，呢個煎三文魚配泰式酸汁我地都係第一次食，仲有紫色果d係紫蕃薯！三文魚煎到好香口，配個酸酸地既汁好清新，食落一d都唔油膩。仲有個紫蕃薯勁特別，一來個組合已經好新鮮，二來食落match，紫蕃薯甜甜地加酸酸地既汁好味得黎又唔會蓋過三文魚既味~
比利時朱古力布朗克蛋糕
最後就到chocolate brownie， haha呢個係我好鐘意既甜品，師父整得好靚，云尼拿雪糕再配上熱熱地既brownie有d溶溶地真係最佳既配搭呀，加埋士多啤梨，好味！
兩個人食飽告埋單平均$400一個，質素滿意，有下次~
