金記冰室 (八號花園) (Closed)

大埔中心一向多美食，每一晚都會頭痛諗食乜嘢，不過好彩有啲新開張嘅鋪頭可以試吓。買完野經過見到一間港九新界都好多分店嘅連鎖冰室，一直都想試吓，今晚有機會了。店員都非常體貼，我哋一坐低隨即俾咗我哋一人一杯水。餐廳嘅環境裝修以綠色為主，而且古色古香，連裝糖嘅杯我記得係90年代嘅時候，我嫲嫲成日用架🤣🙈。餐牌嘅種類繁多，仲設有兒童餐。由於我哋實在太肚餓，一口氣就叫咗以下幾款食物 :金牌乾炒牛河炒得好有鑊氣，而且好入味，牛肉嘅份量都頗多，食落去一啲都唔油，反而炒得好乾身，牛肉味道濃郁，難怪成為金牌食物之一。見到鐵板餐嘅食物圖片咁吸引，我哋唔少得叫一份。鐵板美式雜扒意粉配以黑椒汁，當中包括有雞扒、豬扒同埋牛扒，仲有腸仔同煙肉添。最欣賞就係雞扒，因為雞扒嘅皮煎得好香脆，而且雞肉質感比較軟，好嫩口，唔錯唔錯。男人飯嘅炒蛋叉燒飯又係好吸引，食落去炒蛋質感好滑，配以軟林林嘅叉燒一齊食，送飯一流。還有金磚風沙炸豆腐，每一件都非常大件，而且外皮脆卜卜，豆腐唔會散，仲要好滑！另外其他小菜食物都好好食。最後仲有甜品-金粒西多配雪糕為呢一餐豐富嘅晚餐畫上句號。