SOI.38 Modern Thai Street Food (Closed)

朋友係油街擺展覽，捧完場就去附近食飯，兼慶祝隊長同另一位三月之星既生日，於是揀左巷卅八，既可以滿足另一位壽星想食泰國野，睇落又好似坐得舒服d。
可能北角既餐廳都係以附近街坊為主，所以入到去都幾舒服，星期六都唔會話催你交檯。費事諗，所以坐低就叫左個6人餐，不過年輕的侍應落單落到甩甩漏漏，都已經想反眼，乜一個6人餐甘難落咩！？
先黎個泰式炒通菜、炒金邊粉同泰式炒飯⋯⋯下？仲乜由尾食番上頭架？不過個炒金邊粉要讚，因為炒得乾身唔油，面頭既銀芽都夠新鮮，食落仲爽既。跟住就黎個冬蔭公，由於隊長怕辣，我只係飲左半碗，覺得酸左少少，不過就幾多料同海鮮，幾隻蝦都大大隻。跟住就好似趕時間甘，同一時間上晒其餘既菜，都未食得切，張檯都唔夠位擺，仲要叫我地比位佢擺，叫佢停一停唔好上條魚住，先識停⋯⋯繼續反眼⋯⋯隻雞同青口唔得，雞太咸，青口好un；至於串燒同併盤都ok，串燒豬都唔會話燒到好un，併盤個蝦餅比較出色，蝦膠打得彈牙；上埋條魚，好似上面既配菜仲多過條魚，條魚無乜肉。
最後想一次過食埋甜品同蛋糕，叫佢先收碟，點知那位年輕的侍應收完2隻碟，拎番入廚房之後，好似失憶一樣，完全唔記得要繼續收碟⋯⋯至於個甜品芒果糯米飯，催左好幾次先黎⋯⋯um，芒果唔夠甜，糯米飯一半係黑糯米，另一半係白糯米，不過黑糯米既感覺怪怪的，d糯米好硬。
最掃興係上蛋糕果下，朋友買左雪糕蛋糕，拎入餐廳果下已經千叮萬囑只需要放普通雪櫃下格就可以，因為雪糕蛋糕要時間溶⋯⋯佢地應該無理，照放係冰箱，直到叫上蛋糕果下先拎出黎，個蛋糕硬到切唔開，阿姐仲要企係隔離食花生甘樣，仲要我地自己好努力甘切，完全無諗住幫手，仲要收我地切餅費！？好掃興既一餐生日飯，食物好，但服務差都唔會有下次！