鱈卵屋 (Closed)

香港少有以明太子做為主題既餐廳，所以決定黎試下。餐廳店内採用簡單整潔既裝潢，比人既感覺都舒服既。牛油果配搭吞拿魚刺身，估唔到呢個配搭艘幾夾，再加上有少少芥末既味道，成碟菜式清新得黎又開胃，係一道不錯既前菜。但係份量真係好細，同Menu都幾大分別，幾啖就食晒。呢碟多士拼盤係由2塊蒜茸多士同2塊明太子多士組成。蒜茸多士聞落好香，但食落味道好淡，無咩蒜茸味。明太子果邊就相對地出色好多，上面仲有d白飯魚帶到d鮮味出黎。有樣要讚既係2種多士都整到好香脆。明太子上湯蛋卷係必叫，d蛋好滑，而且夾落係唔會散，d明太子仲要多到爆晒出黎。呢度既鱈卵碗好貼心，怕你食得太飽所以有Jr比你揀。一開始我地仲猶疑究竟叫唔叫Jr好，到個火灸三文魚&火灸油甘魚鱈卵碗黎到既時候，我地好慶幸無叫到Jr，因爲一如既往，份量係好細，所以我都唔敢想象Jr到底有幾細。有三種食法係幾特別既，但可惜d飯好似隔夜咁，全部痴埋一舊舊，撈既時候已經好大力咁整散d飯，可惜都仲有好多整唔散。呢碟豆腐燒無咩特別，都係一個字 - 細。總括黎講，食物不太差，可惜份量小，性價比不高。