嚐.鵝小廚 (Closed)

本身諗住番屋企補做冬，經過杯渡個邊大牌檔個時，發現多左間新舖，叫嚐·鵝小廚。我就咁企係斬燒味位睇，覺得掛起個3隻燒鵝燒得色澤唔錯，就問伙記係咪得堂食，點知佢地話我聽，家下做緊特價半隻鵝只係$158，仲可以外賣。我諗都唔諗就要左半隻加餸，心諗燒鴨都要咁既價啦。師傅好快斬好半隻俾我，我大概用左半個鐘鬆d番屋企，番到屋企隔住個盒仲感受到鵝既餘溫同鵝香味。開盒之後見到盒內仲有好多肉汁，而隻鵝本身又唔會太瘦太肥。之後我仲開飯前偷食左舊，皮脆無騷味，真係無得彈，仲暖暖地，證明係隻鵝即燒即賣。另外肉與淋軟，唔會好似鴨肉咁實肉。食飯個時，屋企人對呢隻鵝都有讚無彈，話好抵食，都搞到我地心郁郁想再試下舖頭其他菜式。