平日夜晚都好多人， book定枱穩陣啲，餐廳係以中式宮廷做主題，裝修、餐牌嘅設計、同埋餐具都好有特色。
店員叫我哋先揀湯底，我同朋友都未食過卜卜蜆，就趁呢個機會試下啦! 仲可以走青(我地麻麻地唐芹 )。
湯底好快就送嚟，啲蜆數量都幾多，感覺都足料。然後我哋先再order火鍋生料，我哋叫咗牛肉、餃子、丸類拼盤、醉雞、滑雙拼。
喺火鍋生料嚟之前，我哋就食咗啲蜆先。 啲蜆每一隻都冇沙，又鮮甜，而且數量都好多，我哋兩個覺得好似食極都有咁。另外，呢個湯底本身有好多芽菜，我覺得啲芽菜索咗啲湯底都幾正，我 食咗好多。
酒香陳年花雕浸牛肉
百零蚊份量都唔算少，啲牛肉淥十零秒就食得，酒香啱啱好，唔會太濃但又夠入味。 牛肉嘅質地比較軟嫩，亦都幾有牛味。
肉丸拼盤
有五款丸，每款兩粒。食得出每粒都好新鮮，同平時買嘅急凍丸係兩回事。 尤其之前我哋都係比較多喺屋企用急凍食材打邊爐，突然食番啲新鮮嘅手打丸，真係覺得好大分別! 啲丸嘅質地係比較滑，又有少少彈牙，亦都食得出鮮味。 呢個真係必點呀。
陳年花雕醉雞
同牛肉一樣，酒嘅味道啱啱好，雞肉好嫩滑，味道都唔錯。
鳳尾鮮蝦雲吞
呢款餃子幾特別，第一次食。佢係一個有豬肉餡嘅餃子，再加埋原隻嘅蝦喺入面 。所以一煮熟，個餃子就會曲埋。 味道唔錯，餃子幾有鮮味，隻蝦都幾爽口彈牙。
蟹子蝦滑 瑤柱乾貝滑 雙拼
其實同啲丸都好似，應該都係同一樣或差不多嘅材料。 反正我哋對個丸類拼盤非常滿意，可以再encore 類似嘅嘢食，都幾開心。 個干貝滑係第一次食，好好食。
呢個份量兩個人啱啱好，非常滿足
估唔到最後仲有甜品送呀，呢個奶凍又滑奶味又重，凍凍地，好正呀!
除咗食物，呢度嘅服務都好好㗎，我哋張枱主要由一個阿姐serve嘅，佢好有禮貌，而且效率都好高。令到我更加享受呢一餐。
我同朋友都話下次再約其他朋友打邊爐，都會提議嚟呢度。雖然呢度收費不便宜，但係食得出啲食材係靚又新鮮。想食平啲啲嘅，可以留意佢嘅時段優惠，咁就可以慳番少少啦。
