日日涮 (Closed)

打風期間留左喺屋企兩日，食左幾餐即食麵、罐頭，落波第二日就梗係食番好少少。揀左屋企附近呢間日日涮火鍋食放題，因為我都食過，知道質素ok嘅。當日晚上唔係好多人，所以非常舒服，枱與枱之間距離，所以坐得好鬆動。你知啦，好多時食放題，最怕就係張枱細到放都放唔落野。呢度主打牛、海鮮火鍋，咁同大部份呢類放題一樣，揀唔同嘅牛，就唔同收費，豐儉由人啦，咁我多數揀中間果款，唔好太差，又唔洗太好。美國頂級肥牛套餐，牛肉、豚肉、雞肉任食，然後按你人頭數量，會供應埋海鮮同刺身。飲品有十幾廿款、甜品，雪糕樣樣任食，質素高架。刺身有鱆紅魚、海膽、蝦、三文魚腩等，唔係自選，係師傅安排嘅。整體都好新鮮，比起好多火鍋放題嘅刺身，好好多，仲有海膽都夠鮮甜海鮮拼盤方面有蟹、蝦、元貝、龍蝦、青口、蜆、沙白等等，半隻龍蝦夠哂滋味，蟹肉仲有蟹膏，不過我記得我上次來，就唔係同時有哂呢兩樣嘅。蝦肉爽口新鮮沙白一開殼食得，鮮甜！呢隻牛嘅質素唔差，唔會好薄或者老，值得一提，我見冇乜人講，其實佢呢度隻豚肉幾好食架湯底有六、七款選擇，而自選區都有幾十款食物、配料，例如蔬菜、丸、粟米、菇類、木耳、麵等，選擇夠哂多！而且都好企理，fill得快。