西塘花記 (Closed)

我同朋友都好中意食餃子，所以今日黎到一間好適合打咭既餃子店食野。 呢度係主要食花式餃子，顔色鮮豔，不過係天然既色素整成，可以安心食用，可以話係又睇得又食得。餐廳既環境係走中式古典風既路線，而且帶點簡約，俾人感覺好舒服自在。餐牌上既食物款式同種類都幾多，淨係餃子都已經有好幾款。我地叫左個雨花石水餃，裡面包左馬蹄同豬肉。而水餃皮既顏色係用左紅莧菜火龍果、菠菜汁同南瓜汁呢3種蔬菜汁，賣相好靚，餃子皮厚薄適中，口感煙韌，餡料新鮮，有肉汁，馬蹄爽口，豬肉肥瘦岩岩好，唔錯四小福水餃，總共有四隻味，包括:紫菜豬肉、泡菜豬肉、南瓜蝦肉同素三鮮，叫一碟可以試哂4隻味，好滿足，紫菜豬肉既紫菜味道好出，食落好香。泡菜豬肉食到爽日既泡菜粒，少少辣幾惹味。而南瓜蝦肉估唔到又幾夾喎，甜甜地又食到蝦既鮮味，而素三鮮係健康之選，味道清甜。嗌餃子會有湯送，係紅棗雪耳燉雞湯，味道清甜，飲得出真材實料。另外仲叫左兩個小食，手撕雞同涼拌雲耳，手撕雞雞肉嫩滑，夠哂人味，配埋旁邊既青瓜食，更清新開胃。而雲耳就爽口入味，酸酸辣辣，但岩哂餐前食。飲品就叫左紫薯露，係鮮榨既，口感軟滑，紫薯味好濃，而且唔甜，正！