水門雞飯 (汀角路) (Closed)

講到海南雞飯點可以少得水門雞。大大個招牌掛係到，易認 位置又易搵到。我同朋友一齊叫咗三款食物，一個甜品同兩杯飲品。炒通菜好夠鑊氣，上枱熱辣辣，食落辣辣地好惹味，無炒過龍口感爽脆，菜嘅顏色依然翠綠。到海南雞飯，油飯夠味道又夠油脂香，粒粒都充滿油光。雞件份量有啲少 但肉質都算嫩滑，唯一美中不足係個汁，得一款。冬蔭公配河粉嘅味道好正宗，湯底夠鮮味同埋好濃郁，辣辣地之餘仲有蕃茄嘅酸甜味，椰奶味唔重，河粉又滑又彈，啲蝦好大隻無霉但有少少淋身。雖然唔夠彈牙，但好大隻㗎湯匙咁大隻。仲配上一塊脆餅，又脆又香口，重點係好吸湯好好食。依個應該係我係香港食過最好食嘅芒果糯米飯。芒果超級香甜多汁，無霉爛，好新鮮，糯米飯唔會太硬身加上椰奶，飯粒濕潤得嚟仲多咗陣奶香味夾埋食 簡直係去咗轉泰國咁。兩杯冰凍透心嘅飲品作為完美句號。