味道樂居酒屋 (河內道) (Closed)

今日經開河內道見呢間居酒屋充滿日式嘅格局，忍唔住入嚟試吓。黑松露帶子刺身沙律，新鮮嘅黑松露沙律菜配合著酸甜開胃柚子汁，帶子新鮮清甜，比較特別嘅係呢個沙律加入咗幾粒日本蕃薯仔，估唔到番薯仔立糯嘅口感同清新嘅沙律都幾襯。岩鹽脆炸三文魚鱗，呢個脆炸三文魚鱗即係炸魚皮，佢比起平時喺雲吞麵舖食到嘅薄好多同埋脆好多， 個口感比起薯片更薄，完全顛覆咗我一貫對炸魚皮嘅感受。大葱厚切日本煙豚腩，呢個煙豚腩本身有好特別嘅煙燻味道，加埋串燒過後豚腩裏面嘅油脂釋數爆出， 大蔥燒得外表微焦，內心仲係相當清甜脆嫩，同個煙豚腩係一個非常之好嘅配搭。明太子免治雞肉棒，免治雞肉棒食過唔少，但係上面有明太子嘅唔係度度有得食，本身免治雞肉棒經過燒汁嘅薰陶已經相當好食，再加上面頭明太子嘅加持，風味獨特。火炙北海道帆立貝蟹膏卷，蟹膏卷被火炙過後散發著微微嘅焦香，面頭嘅蟹膏絕對起到畫龍點睛嘅作用，令到卷物嘅鮮味更上一層樓。牛肉壽喜燒，壽喜燒一上枱見到裏面嘅粉紅色肥牛已經叫人食指大動，反一反塊肥牛再一啖放入口， 牛味同鮮味同時湧出，加上壽喜燒湯嘅味道甜甜地，令人非常滿足。