用餐時間2.5小時，周日午市時間，第一位價錢$468另加一，第二位半價，加一以原價計算。小童都係半價。
落單用QR Code，有刺身，壽司，燒肉，醬汁燒肉，海鮮，蔬菜，天婦羅及炸物，椒鹽燒，和食及烏冬，雪糕十大種類。
1
1）刺身
先黎一客冰鎮刺身拼盤，係有乾冰製造夢幻效果。海膽魚籽生蠔每人一隻，賣相吸引，生蠔好大隻，又新鮮又實淨唔會太鹹，海膽都唔差，唔太腥，上面撒上少少葱花。刺身整體質素算係咁，仲可以自己炙燒完先食，有以下各款：
帶子：太薄切不過鮮甜
有頭甜蝦：唔差
北寄貝：正常
油甘魚：薄切不過好肥美，魚味濃
三文魚：正常
劍魚腩：麻麻哋，唔夠肥美
八爪魚：好韌
日本每天空運魚生：落左兩次單都無黎到
2）壽司冇胃口亦冇興趣試
3）燒肉
1
先黎一客燒肉拼盤，用哂紙仔指明咩肉打咩肉，好高級嘅感覺！
米澤三元豚西冷：肉夠厚身不過唔韌，又好有豬味
澳洲和牛胸腹：冇乜特別
澳洲和牛肉眼：冇乜特別
澳洲和牛西冷：澳洲和牛當中最好，味道唔錯
美國牛肋骨：好韌
手羽：麻麻
骨付雞肉腸：係脆皮不過好油膩
米澤三元豚腩片：超肥，不過好脆口
牛舌片：好厚切，肉質都算彈牙
值得一提係呢啲肉類本身味道都唔錯（除左牛肉同手羽之外），不過點餐廳提供嘅甜醬油食就夠味。
4）醬汁燒肉
醬汁燒肉就冇label，明顯肉類質素差啲，所以叫少少就上多多。主要食醬油味，肉質普遍韌，不過我覺得味道方面都好食，某些肉就鹹左少少。有醬汁安格斯牛肩胛肉眼薄燒，生薑汁澳洲肥牛薄燒，醬汁米澤豚肉薄燒，生薑豚肉薄燒，醬汁羊卷肉薄燒，生薑羊西冷薄燒，全部我都有叫，不過又好似無黎嗮，食完唔知邊樣打邊樣。
5）海鮮
海鮮好少選擇，海蝦都算爽脆鮮甜，紐西蘭青口就非常差，肉霉又無味。
6） 蔬菜
試左好少，懶得燒。請恕未能盡錄。
燒菠蘿片：好香不過好酸
燒有機金菇同有機本菇：用錫紙兜裝住，質素可以
枝豆：就即食，好新鮮同大大粒
7）天婦羅及炸物
1
我基本上試嗮所有天婦羅及炸物。炸物好食，皮脆饀靚。天婦羅嘅炸皮就厚啲，不過都香脆。可惜冇蘿蔔蓉伴碟。
松葉蟹柳天婦羅：蟹柳有蟹味
大蝦天婦羅：蝦唔大隻不過都爽甜
蕃薯天婦羅
冬菇天婦羅：菇味好香
南瓜天婦羅
茄子天婦羅：好大舊好多汁
榴槤炸彈：榴槤流心好正
紫芋圓：如果芋頭味道濃d就更好
芝士年糕：芝士流心非常鹹香
日式炸餃子
8）椒鹽燒
只係試左雞軟骨串，雞軟骨好脆又唔細粒，我鍾意佢味道唔過鹹，啱啱好。請恕未能盡錄。
9）和食及烏冬
由於冇乜菜食又懶得燒，所以叫返個鍋。清湯豆腐鍋得一磚豆腐，基本上係雜菜鍋，有大量娃娃菜，芋絲，一棵小棠菜，一片紅蘿蔔，一片日式魚蛋，好清淡，味道唔錯。之後encore多一個。牛腩牛筋就冇牛筋得碎牛腩，中伏，唔建議叫。請恕未能盡錄其他食品，我記得仲有兩款泡菜鍋，又有咖喱炸豬排飯等等。
2
10）雪糕
對我呢個雪糕控黎講呢度簡直就係天堂。首先款式多，有脆筒，雪糕杯同雪條。居然有Dreyer's脆筒，真係非常正，面頭杏仁粒又大粒又香又脆，雪糕又滑又濃，窩夫餅就又甜又脆，我哋每人食左至少兩支，有抹茶同朱古力兩款口味。明治藍莓雪條都好香甜。仲有幾款香港製造嘅雪糕雪條，特別鍾意黑芝麻味雪糕，又香濃又滑，食落好似有粒粒芝麻咬，我encore左好多轉。另外仲有榴槤雪糕，味道就淡左少少。亦有幾款Movenpick雪糕杯。其他雪糕雪條味道都唔差，芒果益力多雪條（係芒果形狀既益力多味道雪條）好清新，係紅豆雪條雪得太硬。
除左以上食物，仲有少量自助甜品，沙律，前菜小食近門口。沙律有番茄同粟米沙律，質素過得去。前菜小食有中華沙律，泡菜，螺肉，正常啦。甜品有多款口味嘅迷你慕絲杯，我試左一杯，味道有啲假，基本上唔見有人攞。
飲品全自助，有一個大雪櫃同吧枱。雪櫃有紙包綠茶，解茶，烏龍茶，韓式罐裝飲品（如鮮蘆薈樂，芒果汁），日本罐裝果味波子汽水，汽水啤酒。吧枱有熱茶，熱水，日本清酒，梅酒，柚子酒。
總括食物方面，雖然唔係話有咩特別正野任叫任食，不過普遍質素都可以接受。服務員態度好有禮，仲會主動幫手影相，收碟亦快手，食物基本上無漏單，上菜速度都可以接受。座位舒適，卡位靠窗望到街外景色，冷氣超勁，要靠飲熱茶保暖。我覺得都可以一試嘅。不過我同同行友人食完之後兩個鐘頭內先後肚痾，原因不明，之後再痾多一次，都唔算大件事。
