반찬앤쿡 Banchan and Cook (時代廣場) (Closed)

韓國嘢真係食極都唔厭，所以今日收工就同啲朋友搵咗第二間韓國嘢食。🇰🇷🇰🇷〈牛肝菌蛋包飯〉🍄🍳🍛雖然呢款蛋包飯係冇肉既，但係菇菌類嘅份量有好多，啱晒素食人士，個蛋夠晒滑溜，口感一流。〈烤雞卡邦尼年糕〉🐔🫕烤雞煎得個皮好香脆，一大塊雞扒切成幾舊，份量好多，年糕煙煙韌韌，撈埋卡邦尼醬汁同埋芝士，嚟到呢度一定要試。〈海鮮煎蔥餅〉🫓🥬🦑本身以為煎蔥餅係一大塊咁樣上碟，點知原來係分成三塊，但係每一塊都好大塊，好處係可以令到每一塊都好香脆，唔會變得好易淋，最值得讚嘅係佢嘅汁令到煎餅入邊嘅海鮮更加出，好好味。〈番茜韓式炸雞〉🍀🍗番茜即係我哋平時聽開嘅芫荽，雖然我唔係太好芫荽，但係都好欣賞餐廳會將芫荽絞碎成一個醬汁， 淋喺炸得脆卜卜嘅炸雞上面，芫荽迷一定要嚟試吓。〈濟州綠茶咖啡〉🍵☕️綠茶同埋咖啡嘅味道一樣都好重，而且好香，呢款期間限定嘅飲品，有興趣嘅朋友就記住嚟試吓啦。〈無花果梳打〉🍹呢次係我第一次飲無花果梳打，味道好清新，無花果嘅甜味唔會好假，仲有無花果嘅果肉可以食下，解油膩感一流。