360餐廳 (Closed)

今日去天水圍探朋友，佢話呢度有間餐廳非常之高質，咁就抱着半信半疑嘅心態黎試吓啦。一嚟到見到呢間餐廳，原來唔係普通茶餐廳嚟㗎喎，佢嘅環境同Cafe差唔多，感覺好好坐喎。呢個沙律好fresh，食完好開胃呀。如果忌廉湯味道都啱啱好，飲落唔會太滯。呢個飛魚子蟹棒忌廉汁長通粉好好味，本身以為忌廉汁會好流好滯，但係原來唔會，感覺啱啱好。吉列豬扒生蠔溫泉蛋蓋飯都唔錯，溫泉蛋撈飯又係十分開胃。而且個吉列豬扒炸得夠脆，豬扒亦都夠厚，送飯一流。呢個雙重芝士夏威夷pizza真係超級推介，佢嘅質素比出面專食pizza嘅地方更加好，芝士味好重，而且pizza餅底同啲配料都好夾，差啲同朋友搶住黎食啊。不嬲最鍾意食黑松露嘅我，梗係要叫呢個黑松露蛋黃醬薯條啦。估唔到佢嘅黑松露味咁足，襯埋蛋黃醬薯條，搞到我食到停唔到口。呢個小食拼盤亦都係必經嘅推介，唔單止份量夠，而且佢嘅雞翼好好味，雞肉夠嫩滑同入味。叫咗咁多嘢食食到咁飽，本身以為埋單起碼$500以上啦，估唔到竟然竟然可以咁平，唔怪得朋友咁推介呢間餐廳啦。