潮藝館

Open Now

Now Closed

一向都好鍾意食潮州菜，最近發現尖沙咀呢間新開嘅潮藝館，就決定同屋企人試吓。首先係胡椒豬肚湯，有蠟燭熱住啲湯，飲落辣辣哋，好暖胃，豬肚唔腥，仲有鹹菜，好正。沙嗲牛肉炒芥蘭份量都唔少，芥蘭幾新鮮爽口，沙嗲牛肉好淋好食。普寧炸豆腐幾有驚喜，炸到外面好脆，入面啲豆腐好滑，仲有鹽水點，食落冇咁熱氣。懷舊春菜煲有好多春菜，煲到冧晒咁好入味，同啲肥豬腩肉一齊食，夠哂正宗，好好味。另外嗌咗個蠔仔肉碎泡飯，蠔仔夠多，又肥美，有薑絲同埋豬肉碎，好大煲差啲食唔晒。甜品試咗燕麥一口薯，有四舊，好精緻。主要係暖暖哋嘅紫薯，配埋燕麥同糖，好特別。