Mee...lemongrass (Closed)

上次同朋友慶祝生日已經想鎖定呢間東南亞餐廳，可惜呢間餐廳不設訂位，大家都唔想冒險要壽星女等位，所以就轉左第二間餐廳啦。今次再有機會過嚟銅鑼灣，當然唔會放過呢個機會啦，我哋8:30左右去到，拎飛等位大約十五分鐘左右，有個小插曲，原本係得三個人食，後來有個朋友學完車話想join我地，所以我地三人入座都請店員唔好收走枱面另外嗰份餐具，點知隔左冇耐，有個比較高大既店員，態度唔算好好，質疑我哋問：乜你哋唔係三個人咩？我哋即時話而家四個，當下我地覺得好奇怪，照計就唔會再安排單人客過嚟同我地搭枱坐，何以要過黎質問我地呢？不過大家太肚餓啦！真係唔想理佢咁多！直接叫嘢食啦！

知道呢度最出名無骨海南雞，3個人就叫住半份先吧！後來朋友黎到想叫多半份已經賣晒，的確名不虛傳，我地幾個都覺得好夠雞味又滑，呢個激讚！

油飯就普普通通喇

本身諗住叫個小食拼盤，後來發現單叫小食都唔貴，蝦餅印象中好似$68，餐牌上面寫住四件，原本我真係諗住佢係切開咁計四件，上到枱發現切開有八件，覺得驚喜！因為喺出面食泰國菜好多時候蝦餅份量都唔係咁多，佢有八件真係足料！

另外佢個鳳爪沙律好惹味，薯仔薄餅淡淡薯仔，小食來講我非常推薦！另外都叫咗個炒金邊粉同印尼炒飯，味道唔錯！食到最後加多碟炒通菜，大家都飽到差啲食唔落啦！

1

1

本身我哋都冇諗住叫飲品，但見到周圍嘅食客枱面上嘅飲品都非常吸睛，忍唔住落單！可惜就有啲令人失望，唔算出色！

整體來講呢間餐廳我非常滿意佢嘅食物，飲品下次就可能未必叫啦！員工嘅服務態度有好有唔好，都無損我哋想下次再去嘅意欲，最後埋單每人$200左右，食到咁飽，我覺得幾抵食嘅！