侘寂珈琲 (西九文化區)

Open Now

Now Closed

趁聖誕節去西九龍行吓感受吓聖誕氣氛。網上見到有人推介呢間Cafe就諗住去試吓，叫咗杯flat white外賣攞走。點不知竟然得到一個非常之唔愉快嘅經歷。先唔好講杯咖啡嘅質素，一杯外賣咖啡竟然要等成廿幾分鐘，而講緊嘅係其實前面只有一張單。等待途中只係見到侍應拎出啲食物，而無出過一杯飲品。我哋等外賣坐嘅位正好對住個咖啡機，見到完全冇店員去水吧，即係咖啡機嗰邊其實完全冇人幫手沖咖啡。等咗10分鐘嘅時候我有禮貌地問店員，幾時先有杯咖啡。店員答我舖頭裏面有好多張單所以要等待（個問題嚟啦，明明夾埋我哋只有兩張單）。等咗15分鐘先見到有一位店員施施然喺度開始沖咖啡，前面嗰兩位客人我諗大大話話都等咗差唔多30分鐘先拎到杯咖啡。又落單起計25分鐘後，我哋先拎到杯咖啡。我哋打算同店員反映吓，因為前面根本就冇單，而店員亦冇諗住要幫手處理啲飲品，加上一杯外賣咖啡等廿幾30分鐘其實實在唔係太合理。店員嘅態度非常之惡劣，不停口講話係多單所以做唔到，而我哋離開嘅時候佢哋亦都喺我哋背後議論紛紛。咖啡嘅質素其實唔算係好差。但係你拉呢一個花，仲衰過唔拉。搞咁多嘢整色整水，不如打好個奶泡先啦。