Video
Read full review
2011-10-20
92 views
係一個工業區入面，其中一幢工業大廈內，有一間工廠，名字叫99，所以人人都叫佢做Factory 99。一趟黑色嘅生鐵鐵閘，中間刻有金色99嘅字樣，冇錯，就係呢度。推開鐵閘，沿著樓梯直上，就會見到佢嘅大名，Factory 99，掛係牆身，係由生鐵打造而成，表面鋪滿銹漬，令人望而生畏，地下亦漆上一層金屬色，更增添一份原始嘅味道；樓梯兩旁，則掛滿美國六、七十年代嘅鐵畫、標示，穿過呢條樓梯，就好似由廿一世紀嘅香港，走進上世紀七十年代嘅美國咁。推門而入，第一眼，就見到一塊壁報板，上面釘滿唔同嘅相，展示咗工廠嘅歷史，下面就有一張黑色嘅side table，擺滿唔同嘅擺設，因為時近halloween，當中有唔少嘅南瓜、鬼屋等等，完全唔似一間工廠；再環顧四週，每個”崗位”都坐滿人，大家都非常勤力地”工作”；樓底非常高，沒有刻意的修補，牆身下半部都鋪滿長方形嘅磚，上半部則懸空，全部都漆上白色乳膠漆；四週都掛滿唔同嘅油畫，亦掛有好多halloween嘅佈置，有巫婆、骷髏骨等等；天花則掛著好多盞鑄鐵吊燈，襯上黃色嘅燈胆，別有一番風味；枱櫈全部都係木枱木櫈，與工廠嘅格調非常相襯。係工廠嘅右手邊，有一間可以容納四
一趟黑色嘅生鐵鐵閘，中間刻有金色99嘅字樣，冇錯，就係呢度。
推開鐵閘，沿著樓梯直上，就會見到佢嘅大名，Factory 99，掛係牆身，係由生鐵打造而成，表面鋪滿銹漬，令人望而生畏，地下亦漆上一層金屬色，更增添一份原始嘅味道；樓梯兩旁，則掛滿美國六、七十年代嘅鐵畫、標示，穿過呢條樓梯，就好似由廿一世紀嘅香港，走進上世紀七十年代嘅美國咁。
推門而入，第一眼，就見到一塊壁報板，上面釘滿唔同嘅相，展示咗工廠嘅歷史，下面就有一張黑色嘅side table，擺滿唔同嘅擺設，因為時近halloween，當中有唔少嘅南瓜、鬼屋等等，完全唔似一間工廠；再環顧四週，每個”崗位”都坐滿人，大家都非常勤力地”工作”；樓底非常高，沒有刻意的修補，牆身下半部都鋪滿長方形嘅磚，上半部則懸空，全部都漆上白色乳膠漆；四週都掛滿唔同嘅油畫，亦掛有好多halloween嘅佈置，有巫婆、骷髏骨等等；天花則掛著好多盞鑄鐵吊燈，襯上黃色嘅燈胆，別有一番風味；枱櫈全部都係木枱木櫈，與工廠嘅格調非常相襯。
係工廠嘅右手邊，有一間可以容納四、五十人嘅大倉，入面別有洞天，牆身都係鋪滿長方形嘅磚，不過唔係油上白色，係保持原本嘅紅磚色；中間有一張好長嘅木枱，係一張過嘅長枱，足足可以坐廿人，非常適合一大伙”工人”係度”開工”；係角落處，有一度木門，重重深鎖，好似隱藏著工廠嘅秘密，隔離就有一趟木樓梯，走上去，更可能係工廠入面，一個不為人知嘅”私竇”；其餘嘅擺設，更顯工廠主人嘅心思。
我哋三個人，被工頭安排到一張高枱，居高臨下，更可以望通整間工廠嘅狀況；一看今日嘅工作清單，足足有十四樣”工作”，有飯，有意粉，有肉，有魚，有美式，有日式，又有東南亞食物，應有盡有，價錢由$48至$54，只有美國肉眼扒索價$69，呢個價錢，係工廈嘅飯堂來講，可能略貴，但以咁樣嘅裝潢，咁樣嘅格局，我覺得唔貴，去普通茶餐廳食個午餐都要差不多$40啦，俾多十元八塊，我覺得值。
我哋叫咗三份餐，美國肉眼扒配黑椒汁跟飯，工館99焗茄醬豬扒飯和英式豬肉腸配野菌薯蓉，湯有中湯和西湯兩款，我哋都不約而同地要西湯。今日嘅西湯係羅宋湯，味濃足料，酸甜程度適中，略帶少許胡椒，微辣，有幾種唔同嘅菜、西芹、薯仔等，亦有牛腩碎，不過份量極少，哈哈。
英式豬肉腸配野菌薯蓉，薯蓉唔似開粉，應該係自家製，不過唔夠牛油和牛奶，所以效果唔夠香，唔夠滑，但一份自家製嘅誠意，都值得讚；豬肉腸，微焦，腸衣頗韌，肉味唔濃，亦唔會過鹹，普普通通啦，不過，我兩位同事都覺得唔錯，但我個人則比較喜歡芝士腸嘅脆皮和芝士味。
美國肉眼扒配黑椒汁跟飯，黑椒汁唔辣，味道唔會太搶，反而唔會影響塊扒嘅味道；飯，覺得唔夠飯香，而且有d乾身，比較遜色；扒，約七成熟，大路嘅煮法，唔嚡，唔韌，咬落有肉汁，但牛肉味唔夠，但以$69一份餐嘅價錢來說，合格有餘，總好過什麼扒王吧。
工館99焗茄醬豬扒飯，一隻鐵鑊上，幾有風味，鑊面鋪滿一層鮮紅色嘅茄醬，見到一件件嘅蕃茄，再加上白色嘅芝士，吸引；揣上枱，更聞到一陣芝士和蕃茄嘅香味，簡直係難以抵擋嘅誘惑，係色、香兩方面，相信已可達標，至於味又如何呢？先吃了一口飯，味道唔錯，微酸，唔太甜，幾醒神、開胃，亦非一般茶餐廳嘅茄醬，唔敢斷言佢嘅茄醬是否新鮮做，但相信大廚定必下了些心思，經處理過才焗；飯亦處理得唔錯，飯粒鮮明，唔會一嚿嚿，亦吸收了茄醬和豬扒嘅香味，ok，比肉眼扒嘅飯好得多，只可惜雞蛋唔多，若然可以加多些雞蛋去炒飯，相信會更好食；至於豬扒，已經切開一件件長條狀，毋須大費周章，咬了一口，並非十分鬆軟嗰種感覺，係比較實心，但實心之餘，又唔會韌，唔會嚡，毋需用刀义，已可以用牙齒嚙開，絕對係我喜歡嘅咬感。
餐飲，我要了一杯熱奶茶，講真，呢杯熱奶茶真係比較失色，有茶味，冇奶味，唔夠滑，唔夠香，比一般茶餐廳還要差，雖然只是一杯餐飲，但總希望有一個美好的完結，希望下次再來時，可以有所進步。
三份餐，埋單$165，每人$55，以咁嘅價錢，食到如此質素和環境，抵食。
Post
