篤篤車 (Moved) New Location

今日放假和朋友穿梭元朗嘅大街小巷，來到一間幾旺場嘅車仔麵店，午市過後仍然坐無虚席，門面和裡面環境都整潔舒服，望吓玻璃上的海報同餐牌，原來是非一般嘅車仔麵檔。 入去坐底，點餸紙有好多選擇，湯底有一款平時好少見嘅鱷魚湯，刺激嘅冬陰公湯，咖哩湯，大眾化口味嘅牛腩湯，清湯都有，辣可以自己㨂大中小辣或者唔辣。車仔餸除左一般嘅蘿白、豬皮、魚旦等等廿多種選擇外，特別既係仲有海鮮揀，珍珠元貝，白蝦仁，青口，墨魚仔，魷魚圈，全都是我喜歡的爽口野，正！ 我地兩個女仔選左一個三餸麵和一個超值套餐。超值套餐啱曬大胃王好抵食，除左三餸麵外，再自選一個大份量小食和油菜，咁多樣嘢包埋一齊都只係六十幾蚊，絕對大眾化價錢。先上枱的是飲品，我地兩個都揀咗薄荷青檸梳打，薄荷葉夠多，夠哂薄荷味，梳打水夠酸又多冰，非常解渴。主菜就叫左牛腩、金錢肚、豬大腸、白蝦仁呢D爽口餸，珍珠元貝真係珍珠咁大粒幾可愛，冬菇夠厚入味，最最最喜歡奶白色嘅鱷魚湯底，湯底裡面仲有紅棗片和杞子，夠特別好好味，比我全部飲哂。 最後上枱的是油菜和小食，芥菜買相唔錯，色澤靚，咬落爽口，雞翼用嘅香料野味，啱曬我呢D重口味嘅人。這間的確不錯，值得再嚟！