1
我地本身諗著都係坐底食午餐，但係整整下都夠鐘食下午茶，索性叫下午茶，呢到既下午茶真係超抵，30幾40蚊就得
我地分別叫左西炒飯同埋窩蛋免治牛肉飯，西炒飯炒得好有獲氣，而且都有好多料，有腸仔，蛋，火腿，蕃茄等等，飯都炒到粒粒分別，唔會太油又唔會太乾，大廚有啲功力!
窩蛋免治牛肉飯而家出面都唔係好多茶餐廳有做，呢到仲有得食，上黎個陣見唔到隻蛋仲以為佢漏左，點知原來佢係放左係啲飯入面，真係估佢唔到，免治牛肉好夠味，加埋中間隻窩蛋，蛋黃流出黎包著牛肉同埋飯一齊攪勻，一啖食落去，個味道同口感真係好正
我地仲叫咗個咖哩牛肉煲，呢個煲黎到個陣好香，咖哩味濃郁，牛肉本身有煎過，所以有少少脆口既感覺，但又唔會好韌，都仲好軟嫩，食落去好有口感，掛埋咖哩汁，好送飯
最後我地仲叫左去懷舊餐廳必叫既瑞士雞翼，雞翼完全入曬味，瑞士汁個種甜甜地既味真係好令人懷念，而且雞翼煮到好淋，基本上唔使咬都已經可以啃到舊骨出黎，好出色! 我地仲特登再叫多4隻食!
整體來講，呢到既野食味道好好，價錢都好抵，絕對適合做平時既飯堂!
