鋪頭雖然唔算大，不過乾淨企理，仲採用咗工業風嘅設計，十分型格！夜晚配合埋佢嘅燈光佈置，別有一番風味，最啱同朋友坐低飲杯嘢chill下！
鱻魚三寶咖喱喇沙
平時食嘅喇沙好多都係好重椰漿味，但呢度主打嘅係原汁原味咖喱湯底，齋睇顏色都已經知道個湯係幾咁濃郁足料。而且飲落口仲要係好醇好香唔嗆，相信係用咗好多香料去炒香個湯👍餸方面有魚蛋、魚餅同魚腐，兩個人share都平均食咗成四五嚿，好足秤！🫶
火熱馬拉砂煲肉骨茶
係好有心思嘅一煲肉骨茶！用砂煲上已經係一個大驚喜，上菜嘅時候仲係滾㗎🤣店主姐姐仲好有耐性同我哋講解呢個肉骨茶嘅獨特之處，同一般肉骨茶唔同，呢個係重藥材味而唔係重胡椒味，有當歸、黨參、黑棗等等，係好啱女仔嘅養生食物！而佢哋仲會配埋油炸鬼同秘製蒜香米餅俾我哋，全部都係新鮮脆卜卜，索湯一流🤩
之後我哋仲加咗個蒜蓉炒雜菜，係好養生嘅一餐！😍
鋪頭而家仲有出咗盒裝嘅喇沙同肉骨茶，全部都係放喺熱水20分鐘就可以食到同堂食一樣嘅質素，最啱要番工但又想食到好西嘅懶人一族！😚
