楠天Kitchen

Open Now

Now Closed

以為科學園「楠天」只係一間普通茶餐廳？咁你就走寶啦！原來夜晚搖身一變成為私房菜館，我哋4個人試咗8道菜，未食甜品已經飽到捧住個肚走，質素絕對令人驚喜！花旗參石斛燉雞一上枱就聞到濃濃花旗參香！湯料超足，有齊花旗參、石斛同半隻雞，飲落甘甜潤喉，燉雞肉質腍到一夾就散，絕對係誠意之作。焦糖脆皮拔絲叉燒全晚最驚艷！拔絲效果靚到唔捨得食～叉燒肥瘦適中，外層甜脆，內裡軟嫩，蜜糖香唔會死甜，食多件都唔膩！古法蝦子柚皮而家好少地方食到嘅懷舊菜！柚皮完全去清苦澀味，炆到入口即化，加上滿滿蝦子鹹香，帶淡淡海鮮味，功夫十足！荔蓉蝦多士荔蓉綿密又Creamy，蝦多士炸得金黃酥脆，但一啲都唔油膩，蝦肉彈牙，配搭恰到好處。瑤柱炒桂花粉絲芽菜炒得乾身又夠鑊氣，瑤柱絲同蛋碎均勻分布，鹹香惹味，。黑松露瑤柱蛋白炒飯飯粒分明乾爽，黑松露香氣濃到撲鼻！瑤柱同蛋白增加口感，炒得夠鑊氣又唔油膩。豬油渣炒菜苗菜苗翠綠爽嫩，豬油渣香脆惹味。黑糖冬瓜牛奶桃膠甜品同樣出色！桃膠煮到軟滑，黑糖冬瓜甜而不膩，牛奶香滑，滋潤又解膩，為呢餐畫上完美句號。