坐低發現餐牌上大多都係食牛扒，另外仲有個tasting menu只需$688，包前菜、配菜、主菜、甜品，都幾抵食～不過今次唔太餓，決定自己揀兩款main搭啲小食。
前菜-脆炸蘑菇仔
上檯見到份量都唔少，絕對對得住個價格。名副其實脆炸，食得出新鮮製作，外面薄薄一層超級酥脆，咬開爆汁，菇味濃郁，正！
澳洲M9頂級和牛小排
一向都鍾意牛小排嗰種油膩感，今次就叫咗五成熟試一試。切開已經見到好juicy，一口咬落去果然油脂感重，分佈幾平均，牛味唔淡幾濃郁香醇，肉質剛好夠細膩嫩滑，友人大愛，推薦！
法式寶雲蘇紐西蘭肉眼牛扒
外面成日見嘅寶雲蘇羊架呢度竟然配搭落牛扒，果然創新。肉眼扒面頭鋪滿一層麵包糠，中間夾咗芥末醬，焗得好香脆。切開見火候適中，無過時，依舊粉嫩，食落肉質相對厚實有咬口，牛味實在又直接，加上醬汁同原有調味，份外有層次，值得一試。
跟餐會有埋配菜薯條，出奇地好味，炸得香口，薯條面頭本身已經灑了黑松露碎粉，加上黑松露醬，好香濃。
另外仲叫咗個心太軟甜品，上枱成幅畫咁靚好精緻，主角唔會太甜，朱古力味都幾濃厚，仲有啲士多啤梨醬、梨肉果凍、兩種口味嘅雪糕，清新怡人，為呢餐寫上完美嘅句號。
最後推薦叫埋飲品，食牛扒配紅酒真係冇得輸，今次叫杯HouseRed都唔差，酒體適中，唔會太薄，口感圓潤，係呢個環境下絕對係加倍享受。
