CHiLL-i (Closed)

其實觀塘工廈多美食好多人都知，如果想平平地食個西餐的話，呢間係一個唔錯嘅選擇。百零蚊有個set包starter、main course同drinks。Starter有沙律、蘑菇湯同多士，沙律係新鮮嘅，蘑菇湯好濃郁，仲食到少少蘑菇粒添，多士就外脆内軟，點下個蘑菇湯會更好味。澳洲T骨牛扒分量好大，有成300g。脂肪分佈均勻，肉質都算幾好，個醬汁有少少偏甜。鐵板法式脆殼田螺臘腸意大利飯呢個真係第一次食，原本以爲田螺個殼係唔食得，點知原來係挖左d田螺肉再釀喺個脆嘅殼入面，非常有心思同驚喜。西式田螺同中式臘腸又意外地夾，意大利飯近鐵板嘅位置又會有飯焦，好似食緊煲仔飯咁，非常特別。