呢個價錢有16舊壽司都幾親民，仲要每一件都大大舊又新鮮！三文魚勁肥勁香，呑拿魚都好甘香，有似赤身既感覺，海膽鮮甜，但紫菜唔夠脆，變得好難咬開，甜蝦勁大隻勁甜勁肥美，唯一最失望係舊八爪魚，好「銀」好難咬，仲好腥，拖低左全碟既水準！
蔥花海膽大板卷$88
海膽和風軍艦$84
呢兩件都係邪恶之選！有超級鮮甜既海膽配合拖羅蓉，每一啖都好滿足，兩個味道融合左，已經唔再需要分邊啖係拖羅邊啖係海膽了。。唯一美中不足都係佢塊唔夠香脆既紫菜。
蟹羔蟹肉玉子燒$98
見佢個樣唔係好討好，但食落又幾好味，雖然裏面唔係包住好多蟹羔，但咬落去都有一絲絲既蟹羔味，又唔會太漏，幾正！
蒜香牛舌粒$68
一叫呢個店員就見我地諗清楚因爲呢個唔係牛舌芯，可能會覺得太「銀」咬唔到，但考慮左一陣，我地都係決定試一試。
點知，呢個真係令我地好有驚喜，可能本身無乜期望啦！一咬落去，超級嫩滑，仲有啲炸蒜撈埋係鐵板上面，好香口好惹味！仲要有好多，性價比勁高！
龍蝦粥（2-3人份量）$268
見好多人都叫呢個熱門菜，我地都試一試，呢個即叫即整，趕時間既朋友就唔好叫啦因爲制作需時呀。一上枱，佢蒲面既龍蝦多到見唔到啲粥禁濟，全隻龍蝦上，認真抵！雖然龍蝦無羔，但肉質鮮甜爽口，食得出好新鮮！粥底都好甜，食完唔會好渴，唔似落左好多味精，推介推介！
