1
餐廳環境舒適，坐位唔會太迫，有5張4人枱和一張bar枱，門外另有擺放一張4人枱。每張枱都有擺放紙巾同搓手液。店員態度親切友善，又會介紹一下餐廳推介。
餐廳有健康低卡既椰菜花飯提供，岩晒我呢啲減肥人士，我叫左一個日式咖喱雞碎花（碎花=椰菜花飯），兩位小老闆一個叫左蘑菇卡邦尼意粉，一個要蔥油豬扒蛋飯，另外仲叫左一個燒汁鯖魚。
日式咖喱雞碎花
椰菜花飯味道唔會太濃太咸，配埋日式咖喱味道剛剛好，咖喱都唔會太辣，我想食日式咖喱好耐，但咖喱一定要配埋飯先好食，我已行低碳飲食多年，呢間餐廳嘅椰菜花飯可以滿足到我嘅慾望。
蘑菇卡邦尼意粉
呢個意粉係即炒的，所以製作需時，意粉軟硬度適中，醬汁夠軟滑creamy，中間放咗一隻蛋黃令賣相更好同時增加蛋黃的味道。
蔥油豬扒蛋飯
豬扒煎得好香，蔥油比例一流，蔥花又香又爽脆，隻蛋都煎得好靚，小老闆唔捨得食隻蛋，留到最後先食
。
燒汁鯖魚
鯖魚皮煎得微脆，魚肉都唔會乾，配埋燒汁一流。
每個餐都會有一小碟配菜跟埋，感覺上健康一點。飲品可選汽水或+$3自家製羅漢果水/檸檬薏米水，我好後悔冇加錢叫檸檬薏米水，因為見到隔離幾台嘅客人都係叫薏米水，賣相都好吸引，下次再嚟一定要試吓。
另外幫朋友外賣了一個蔥油雞扒蛋碎花，朋友表示好味，但如果可以有更多蔥油就更好。另外因為外賣會有倒汗水，所以椰菜花飯比較濕，如果外賣嘅人記得要盡快趁熱食。
這間餐廳晚市做埋串燒的，搵日一定要黎試下。
1
